Diretór Jerál Peska Ministériu Agrikultura no Peska, Acácio Guterres. Imjaen/Espesiál.

DILI, 4 juñu 2019 (TATOLI)-Diretór Jerál Peska, Ministériu Agrikultura no Peska (MAP), Acácio Guterres, informa,  iha preparasaun planu no programa ba Orsamentu Jerál Estadu (OJE) 2020 nian, Governu planeia atu sosa ró peska unidade tolu no tau mós orsamentu atu prepara joven sira atu ka’er ró ne’e.

“Governu mak atu hola ró rasik depois treinu joven sira ho ema ne’ebé esperiénsia atu ka’er ró hirak ne’e bá tasi mane para hakaer ikan,” informa Acácio Guterres, ohin, iha Edifísiu MAP Comoro, Dili.

Diretór Jerál ne’e dehan, Timor-Leste nia tasi luan liu iha parte súl, maibé problema mak peska ilegál iha ne’ebá no nia impaktu hosi atividade ne’e estraga rekursu Timór nian, tanba ne’e presiza prezensa Timór nian liuliu ba peska para ema hatene katak tasi ne’e nia na’in iha.

Preparasaun orsamentu atu investe iha ró peska nian, Diretór Jerál ne’e dehan, daudaun ekipa téknika prepara hela no halo kálkulu ba investimentu ne’e hodi tau iha planu orsamentu 2020.

Iha fulan kotuk, Diresaun Jerál Peska simu orientasaun hosi Primeiru-Ministru liuhosi Ministru Agrikultura no Peska, Joaquim José Gusmão dos Reis Martins, orienta ona tékniku atu prepara planu no programa 2020 inklui atu investe iha área peska liuliu ba iha infraestrutura no mós ekipamentu peska.

Nia hatutan, tékniku tuur hamutuk ona hodi haree tanba iha 2020 ne’e Governu orienta atu hola ró unidade tolu para halo operasaun ka’er ikan iha Tasi-Mane no tau mós orsamentu atu prepara joven sira ne’ebé aban-bainrua atu ka’er ró liuliu ba kapitaun ró no sira seluk tan.

Diretór Jerál dehan, ba ida ne’e, sei servisu hamutuk ho Sekretáriu Estadu Formasaun Profisionál no Empregu hodi haree joven sira ne’ebé iha interese no sei tuur hamutuk hodi halo treinamentu ba sira no mós sei fó prioridade mós ba timoroan sira ne’ebé serbisu iha área peska nian.

Iha semana kotuk, Diretór Jerál ho ekipa bá Darwin-Austrália, hodi halo soru-mutu iha ne’ebá hodi ko’alia oinsá halo kooperasaun atu haree hodi halo jestaun ba rekursu liuliu iha Tasi-Mane tanba país rua ne’e mak baliza, ne’ebé atu hametin kooperasaun liuliu atu kombate peska ilegál.

Jornalista      : Maria Auxiliadora

Editór            : Francisco Simões

HAKEREK NO HATÁN

Please enter your comment!
Please enter your name here