Ministra Finansa ein ezersísiu, Sara Lobo Brites. Imajen/Egas Cristovão

DILI, 03 juñu 2019 (TATOLI) – Ministra Finansa en ezersísiu, Sara Lobo Brites informa katak Rejiaun Administrativa Espesiál Oe-Cusse Ambeno (RAEOA) tinan 2019 iha hela faze tranzisaun no tinan 2020 bele integra ona iha sistema Government Resources Planning (GRP) ka Planeamentu Rekursu Governu.

“Sistema atu uza loloos ne’e iha tinan 2020, maibé agora daudauk tékniku Ministériu Finansa servisu hamutuk RAEOA para bele hetan informasaun no publika daudaun iha portál, nune’e públiku bele akompaña,” informa ministra ba jornalista sira iha Palásiu Governu, segunda ne’e.

Hodi informa tan, iha orsamentu 2019, iha sistema tau orsamentu iha verba transferénsia públika, nune’e kuandu transferénsia públika ona no bainhira Governu sentrál transfere sai ona, entaun tama ona iha kompeténsia instituisaun ne’ebé mak simu atu jere rasik nia osan.

“Sei Governu transfere ona osan sai no rejista nafatin iha kontabilidade sistema nia mak sei duplika fali prosesu ne’e,” katak governante ne’e.

Governante ne’e mós dehan, Lei Orsamentu prevee artigu ne’ebé mak fó tranzisaun durante preparasaun no RAEOA sei uza lai ninia sistema rasik to’o tinan 2020 mak tau osan labele ona iha transferénsia públika maibé tenke tau tuir kategoria, hanesan mós ministériu, munisípiu, no Ajénsia Autónomu sira para bele uza sistema ida de’it. “Lei permite atu RAEOA jere tuir sira nia sistema rasik”.

Nia akresenta, bainhira sistema atu monta tenke halo preparasaun lubuk ida no Ministériu Finansa ninia ekipa ne’ebé koordena prosesu ne’e la’o hela, maibé iha sasán balun mak tenke prepara uluk molok tama iha implementasaun sistema.

“Empreza mak naran FreeBalance mas sistema ida ita uza ne’e naran GRP. Sistema ida ne’e iha lei mak define katak ita nia Governu uza sistema úniku plataforma GRP.

Tuir Ministra, Governu tenke iha planu iha tempu naruk no sei hakarak atu uza sistema rasik tenke halo preparativus no tenke hare mós ba rekursu para bele harii sistema rasik.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here