Ministra Finansa ein ezersísiu, Sara Lobo Brites. Imajen/Egas Cristovão

DILI, 03 juñu 2019 (TATOLI) –Governu liuhusi Ministériu Finansa (MF) sei hola raiu-X ka “X-Ray” hodi deteta sasán sira ne’ebé tama no sai iha Timor-Leste (TL).

Ministra Finansa en ezersísiu, Sara Lobo Brites rekoñese, maski iha ona X-Ray ne’ebé monta iha Postu Integradu Batugadé, maibé sei iha problema ba kustu manutensaun tanba ne’e dalaruma X-Ray aat no la deteta sasán sira.

“Alfándega iha X-Ray marka rua Smith no koreanu nian, ita-nia problema mak X-Ray sira ne’e, liu-liu marka Smith, nia kustu manutensaun aas tebes. Ita halo manutensaun hanesan ita hola X-Ray foun ida. Tanba ne’e mak ministériu haree hela hodi tau orsamentu para tinan oin sosa fali X-Ray foun,” tenik Ministra ba jornalista sira iha Palásiu Governu, segunda ne’e.

Governante ne’e dehan, kona-ba kazu droga ne’ebé Autoridade Alfándega Indonézia preende suspeitu timoroan na’in rua iha Alfándega fronteira Mota-Ain, iha autoridade kompetente sira mak bele hatán, maski nune’e servisu alfándega Batugadé hato’o ona relatóriu ba Ministériu Finansas.

“Simu relatóriu iha kedan loron akontesimentu iha kuarta (29/05) no sira hatún ona ekipa ba iha Postu Integradu Batugadé para halo investigasaun iha ninia prosesu. Kona-ba saida mak la konsege deteta husi ita-nia parte maibé deteta fali iha Indonézia nia área alfándega,” katak governante ne’e.

Tuir Ministra, X-Ray funsiona hela maibé dalaruma to’o tempu nia bele aat, nune’e tenke iha rekursu tékniku atu halo manutensaun.

“Bain-bain funsiona maibé kuandu aat uitoan ita hasai osan lubuk ida, tamba ne’e ministériu planu tinan oin atu hare marka ida ne’ebé mais baratu no funsiona hanesan,” hateten tan ministra ne’e.

Lee mós notísia: http://www.tatoli.tl/2019/05/alfandega-atambua-kaptura-timoroan-fen-laen-lori-droga/?fbclid=IwAR3vJM3bK4twb6YwRrRJu5ff52XueC61QT7OokH5DkaH5GRIiEWzGEV6pDA

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here