Kontra atake entre jogadór Sporting no FC Lero. Imajen Mídia LFA

DILI, 02 juñu 2019 (TATOLI)—Sporting Clube de Timor hamoe FC Lero ho golu 4-0. Sporting atinje rezultadu ida ne’e liuhusi jornada daruak Segunda Divizaun grup B Liga Futeból Amadora (LFA) ne’ebé hala’o iha Estádiu Munisipál Dili, ohin loraik.

Sporting halo golu sedu demais. Sura minutu de’it. Golu marka hosi Hermino de Sousa (10) iha minutu 9. Golu refere lori Sporting lidera provizóriu jogu 1-0.

Maski simu ona golu ida, Lero nafatin hatudu espíritu jogu. Halimar bola pasa ba malu barak liu bola rai. Objetivu ida de’it. Sira hakarak hatama golu liuhusi estratéjia pasajen bolu ho neik maibe beibeik.

Esforsu hirak ne’e naben de’it. La rezulta golu ruma hodi fó kontente ba adeptu sira ne’ebé hakilar Lero… Lero… Lero iha tribun sori-sorin.

Minutu la’o ba beibeik. Lero nia rítmu jogu mós komesa tún ba beibeik.  Aproveita rítmu jogu tún, Sporting bense tan Lero. Iha minutu 29, Hermino de Sousa lansa tan golu ida liuhosi pasajen bola dook (bola long-termu inglés) hosi defeza sentrál, Leandro Amaral (4). Golu aumenta tan sai 2-0.

Golu sai rua halo jogadór Lero hetok la fiar án. Jogu ho arbiru no pasa sala hela de’it bola ba jogadór Sporting. Nune’e, iha minutu 43, Marçal Costa (14) hikis tan golu ida. Golu atinjidu hafoin finta tiha defeza na’in rua, Aristo Madeira (25) no Mário Ferreira (16). Defeza rua sai bilaan. Golu nafilak ba 3-0.

Rezultadu ida ne’e, la’ós jogadór de’it maka dada iis boot maibé adeptu Lero lian lakon derepente. Hili dalan túr nonók no hein milagre mosu atu lori Lero ba vitória maibé imposível.

Hakat ba segunda parte, treinadór AS Lero, Carlos Felix, koko halo mudansa estratéjia. Muda estratéjia bola neik ba bola dook maibé la konsege lees redi Sporting. Defeza Sporting antesipa lais mudansa jogu ne’ebé avansadu Lero lansa hodi hamate no la fó oportunidade ba jogadór Lero atu ezekuta bola ho vontade tomak.

Treinadór muda ona estratéjia maibé la antesipa parte médiu eskerda. Tanba ne’e, Alexandre da Cruz (24) hosi Sporting uza fatin ne’ebé livre hodi marka tan golu ida sai 4-0. Golu ida ne’e nu’udar golu ikus nian hodi fó vitória ba Sporting.

Jogu ne’ebé hala’o dirije hosi árbitru Pedro Carvalho, juiz liña António Carvalho, Filomono da Silva no árbitru rezerva mak Salvador Cabral.

Tabela klasifikasaun provizóriu nafatin lidera hosi DIT FC ho potu 6, segundu Sporting ho pontu 4, terseiru Lero ho pontu 3, kuartu Lika-Lika ho pontu 3, kintu Nagardjo FC ho pontu 1, ikus liu Santa Cruz okupa iha zona mean ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here