Ministru Transporte no Komunikasaun (MTK), José Agostinho da Silva

DILI, 31 maiu 2019 (TATOLI)—Governu Timor-Leste (TL) ho governu Alemaña asina kontratu dokumentu liuhosi Estaleiru Navál “Damen” ba kontrusaun barku daruak ba pasajeiru, Ró Nakroma 2, iha sesta ne’e.

Serimónia asinatura ne’e bazeia ba kooperasaun entre Governu RDTL ho Governu Federál Alemaña.

Dokumentu kontratu asina hosi Ministru Transporte no Komunikasaun, José Agustinho da Silva ho kontratór hosi kompañia Damen Shipyards Gorinchem, Olanda, Gysberth 3, akompañadu hosi Ministru Ensiñu Superiór, Siénsia no Kultura, Longuinhos dos Santos, Sekretáriu Estadu Komunikasaun Sosiál, Merício Akara, Sekretáriu Estadu Arte no Kultura, Teóflio Caldas, Ministru Estadu Prezidénsia Konsellu Ministru, Hermenegildo Pereira ho reprezentante hosi Governu Alemaña, Akimenko.

Ró Nakroma daruak ne’e komprimentu totál ho médida 67,30,  lárguru ho médida metru 16,00, kaladu ho médida metru 3,30, altura konves karga ho médida metru 4,80, velosidade 10 knots/12 knots, propulsaun 2X950 kw (2X1290), distánsia 1,700 millas nautikas, kapasidade karga tonelada 940, kapasidade pasajeiru 380 PAX, sosiedade klasifikadora DGL, kompoizaun klase 370 klase ekonomia, 10 ba VIP no tripulante hamutuk na’in 16.

Projetu ne’e governu Alemaña kontribui orsamentu miliaun €7,8 no Timor-Leste kontribui orsamentu miliaun €7,1. Ró Nakroma 2 ne’e konstrui iha Xina no sei hala’o operasaun dahluuk iha tinan 2021.

Iha ezekuaun projetu ne’e, hosi Alemaña sei reperezenta hosi Banku Dezenvolvimentu Alemaña (KFW-sigla Alemaun), no parte Timor-Leste sei reprezenta hosi Ministériu Transporte no Komunikasaun liuhosi Autoridade Portuária Timor-Leste (APORTIL, IP), hanaran kooperasaun finanseira.

“Segundu Ferry ne’ebé sei dezeña hanesan ró estadu modernu tuir arte ró priénse padraun aas tinan 2019 nian no sei hamenus kustu. Hasa’e kapasidade ba introdúz fó oioin, hasa’e oportunidade ba empregu,” dehan Ministru José Agustinho da Silva iha Salaun Kay Rala Xanana Gusmão, Ministériu Finansa, Aitarak Laran, Dili, ohin.

Nia haktuir, iha tinan 2016, iha téknika kooperasaun ho governu Alemaña, haruka ona tripulante timoroan na’in-lima (5) tuir treinamentu iha ALAM (Akademi Laut Malaysia). Nune’e mós iha tinan 2019, Governu Timor-Leste sei haruka tripulante sanulu resin lima (15) ba estuda no tuir treinamentu iha Politéknika Surabaya, Indonézia.

“Hein katak tripulantes 15 ne’e sei foti hosi Unidade Treinamentu Marítima Timorense–Alemaña iha Tibar no sei halo parte iha operasaun Berlin Nakroma 1 no Nakroma 2,” nia dehan.

Nia hatutan, ró Nakroma 2 ne’e sei halo operasaun ba iha Manatuto, Baucau, Lospalos no Viqueque.

Agustinho informa, iha marsu 2013, iha diálogu kona-ba kooperasaun dezenvolvimentu hala’o entre governu Timor-Leste ho Governu Repúblika Federál Alemaña no iha akordu atu prepara projetu foun hanesan transporte marítima ligasaun ho kosta norte Timor-Leste nian.

Nia esplika, kontratu ba dokumentu ne’e sei kumpri regulamentu Organizasaun Marítima Internasionál (IMO-sigla inglés).

“Komisaun Aprovizionamentu Nasionál mak dirije prosesu aprovizionamentu liuhosi kooperasaun di’ak ho APORTIL no sira-nia konsultan ho kuidadu, transparente no profisionál. Prosesu konkursu hala’o hamutuk dala-tolu. Iha terseira ronda hili lisitadór rua hosi sanulu, no lisitadór seluk la hatudu kapasidade finanseira hodi kaer projetu ne’e,” katak nia.

Hafoin konkursu internasionál konsege hala’o ona evaluasaun no selesaun ne’ebé própriu ba estaleiru hotu no ikus mai nomea Damen Shipyards Gorinchem. Prosesu konkursu tomak realiza hosi konsultór tékniku hosi Alemaña, Moeller GmbH/IMS Nord (IMS Nord) iha ne’ebé halo kolaborasaun hamutuk ho órgaun governamentál Timor-Leste espesialmente APORTIL no Komisaun Nasionál Aprovizionamentu (CNA-sigla portugés).

Purtantu, Konsultór IMS Nord, Móller GmbH, liuhosi komunidade esplika, kontratu refere inklui dezeñu, konstrusaun, fornesimentu no prosesu delivery ka entrega ferry Nakroma 2.

“Dedikasaun ne’e nu’udar alternativu ida oinsá responde ba Timor-Leste nia nesesidade transportasaun ba pasajeiru no mós merkadoria ligasaun kosta norte Timor-Leste,” refere komunikadu ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here