Ministra Finansa ein ezersísiu, Sara Lobo Brites. Imajen/Egas Cristovão

DILI, 30 maiu 2019 (TATOLI)-Ezekusaun orsamentu Rejiaun Administrativa Espesiál Oe-Cusse Ambeno (RAEOA) seidauk integra iha Government Resource Planning GRP) ka Planeamentu Rekursu hosi Governu, tanba sei iha faze tranzisaun.

Ministra Finansa ein ezersísiu, Sara Lobo Brites, esplika, iha lei Orsamentu Jerál Estadu 2019 define tiha ona no Governu liuhosi Ministériu Finansa (MF) servisu hamutuk ho área finansa RAEOA nian para instala sistema ne’e, maibé sei iha faze tranzisaun.

 “Ita bele halo instalasaun loloos ho sistema ne’e iha orsamentu 2020. Tinan 2019 ne’e iha faze tranzisaun. 2019 sei tama iha portál, 2020 uza sistema, maibé ita tenke muda nia estrutura orsamentu iha 2020,” esplika Sara Lobo Brites, ohin, iha Palásiu Governu.

Sara Lobo rekoñese katak, orsamentu RAEOA nian to’o agora seidauk integra GRP tanba iha introdusaun faze tranzitória ida no bainhira RAEOA seidauk integra iha sistema GRP sira sei uza sira-nia sistema rasik, entretantu Ministériu Finansa  bele husu RAEOA para sira-nia dadus bele atualiza iha portál transparénsia.

Sara Lobo haktuir , to’o agora seidauk atualiza dadus no Ministériu Finansa nia ekipa halo tiha ona soru-mutu ho RAEOA, fó ona formuláriu ba parte RAEOA bele prienxe dadus hosi 2018 bá kotuk.

“Entaun ita planu atu atualiza dadus la’ós de’it orsamentu 2019, maibé 2018 bá kotuk. Maibé to’o agora dadus sira ne’e seidauk iha,” informa Sara Lobo Brites.

Hatán sobre dadus sira ne’ebé seidauk iha nee’, Ministra Finansa ein ezersísiu ne’e relata katak RAEOA servisu hela tanba MF husu dadus hosi 2018 bá kotuk dezde RAEOA hahú (iha 2014), entaun ne’e sira sei fornese dadus ba MF.

“Kuandu ita simu ona, tékniku sira hosi sistema informátiku Ministériu Finansa sei servisu para bele atualiza, mas to’o agora seidauk,” tenik Sara Lobo Brites.

Kona-ba lala’ok ezekusaun orsamentu RAEOA nian, Sara Lobo afirma, agora MF laiha informasaun ba ida ne’e no iha tinan kotuk simu duni kópia relatóriu balun ne’ebé RAEOA fó ba Tribunál Konta.

“Ami hetan kópia mai hosi Parlamentu Nasionál, maibé 2018 nia ezekusaun seidauk. Tuir lei, RAEOA sei aprezenta ba iha Tribunál Konta iha 31 ou 30 maiu. Ne’ebé iha semana ne’e nia laran RAEOA sei aprezenta ba Tribunál Konta, espera katak Primeiru-Ministru nia gabinete sei simu kópia ida para ita bele hatene ezekusaun, mas pratikamente 2018 ne’e orsamentu duodesimu no ita la taun osan ba kapitál, saláriu, bens servisu ho transferénsia públika, ne’ebé ha’u-nia haree sei laiha problema iha ezekusaun”.

Sara Lobo Brites salienta tan, sobre orsamentu 2019 ba RAEOA seidauk bele atualiza tanba orsamentu ho montante millaun $76 seidauk transfere ba RAEOA.

Jornalista      : Maria Auxiliadora 

Editór             : Francisco Simões

HAKEREK NO HATÁN

Please enter your comment!
Please enter your name here