Diretora DIFF Lena Lenzen hasai foto hamutuk ho ekipa. Foto TATOLI: Nelia Rosario

DILI, 29 maiu 2019 (TATOLI)-DIFF (Dili International Film Festival) ofisialmente lansa portál (website) www.dili.film hodi interesadu sira halo inskrisaun hodi bele kompete ba produsaun filme badak hodi hatudu sira-nia talentu iha indústria filme.

Kompetisaun ne’e iha oin rua, ida kompetisaun internasionál ba kriadór filme iha mundu tomak atu partisipa nune’e mós ami loke kompetisaun espesiál ba filmmaker lokál atu hatudu sira nia talentu no kriatividade no ami iha prémiu furak ba manan na’in sira,” hateten Diretora DIFF, Lena Lenzen ba jornalista sira iha konferénsia imprensa, iha edifísiu Pixelexia, Palapasu, kuarta (29/05).

Diretora ne’e mós informa katak sira mós iha planu atu prepara treinamentu ka workshop ba kompetidór sira no espera katak kriadór filme sira barak bele partisipa iha eventu refere. “Ami mós deside atu hala’o eventu ne’e ho ekipa tomak ho esforsu tomak no servisu hamutuk ho parseiru husi setór privadu no husi embaixada sira, maibé la husu apoiu finanseiru”.

Parseiru ba DIFF mak Embaixada Estadu Unidu Amérika (EUA) no Timor Plaza (TP) hodi bele apoiu realiza eventu ne’e sai susesu.

“Ami deside atu tinan ida ne’e, la’ós halo buat boot ba Timor-Leste tomak maibé halo loron lima de’it iha Dili, hafoin tinan oin karik bele halo boot liu no involve ema barak liu no susesu liu,” konsidera diretora DIFF.

Iha fatin hanesan, Michael Smith nu’udar mós Diretór Sinema Lorosa’e, konsidera iha Timor-Leste iha istória barak atu konta. Ezemplu, hanesan filme Korea nian ida ne’ebé hanaran “Bare foot Dream” ka Mehi Ain Tanan Ida, ne’ebé nia gravasaun halo iha Timor-Leste.

“Ha’u hanoin iha tempu ne’ebá ema barak maka serbisu iha indústria ne’e. Tanba ne’e, iha futuru ne’e furak, no konserteza serbisu hamutuk ho SEKOMS (Sekretáriu Estadu Komunikasaun Sosiál) ho sira-nia planu no apoiu atu asegura katak ne’e aliñadu tanba ida ne’e iha futuru bele ajuda kria indústria filme ne’ebé forte no profisionalizmu,” nia hateten.

Nia informa, manan na’in ba filme badak sei hatudu iha Melbourne, Austrália, tanba konsidera ema iha Austrália gosta tebes Timor-Leste.

“Sira iha koneksaun boot ho Timor-Leste, iha sinema ne’ebé furak iha Melbourne, iha ema barak hatene kona –ba Timor-Leste, tanba sira sempre hatudu filme. Ida ne’e (filme badak) furak, atu oinsá sira bele hatudu filme Timor-Leste no talentu Timór nian iha Melbourne,” nia haktuir.

Kritéria Ba Kompetidór Sira

Tuir informasaun, kritéria ne’ebé kompetidór sira buka prienxe ba produsaun filme badak mak:

  • Tópiku jerál: “Foti Asaun”, ezemplu kona-ba mudansa klimátika, negósiu ne’ebé susesu, etc;
  • Durasaun minutu sanulu (10 m);
  • Tékniku: la’ós haree ba ekipamentu di’ak maibé haree ba konteúdu istória. Istória ne’ebé nia mensajen bele esplora ka inspira ema seluk hodi aprende;

Manan na’in ba kompetisaun filme badak sei hetan prémiu estátua DIFF. Nune’e mós, manan na’in sira, sira-nia filme sei iha Austrália liuhusi Sinema Lorosa’e no Sun Theatres iha Melbourne iha loron espesiál Timor-Leste nian ba espozisaun internasionál.

Jornalista       : Nelia Rosario

Editór             : Rafy Belo

1 KOMENTÁRIU

  1. Kontente tebes Iha kompetisaun Ida nee.. Espera Filme Iha Timor bele promove talent no cultura Timor ba oin no diak liu tan.. I want to join

HAKEREK NO HATÁN

Please enter your comment!
Please enter your name here