Primeiru-Ministru, Taur Matan Ruak ho membru Governu sira halo retiru daruak. FOTO: GPM

DILI, 29 maiu 2019 (TATOLI) – Primeiru-Ministru (PM), Taur Matan Ruak ho membru Governu sira halo retiru daruak ba VIII Governu Konstitusionál durante loron 29 no 30 maiu, hodi diskute atividade ne’ebé realiza ona dezde inísiu mandatu, define prioridade tinan 2020, hodi bele halo preparasaun Orsamentu Jerál Estadu (OJE) tinan oin.

Sekretáriu Estadu Komunikasaun Sosiál, Merício Juvenal dos Reis ‘Akara’ informa, enkontru ohin, ministériu ida-idak atualiza progresu serbisu mak durante ne’e hala’o ona hodi haree ba prioridade tuir mai.

Nia dehan, prioridade ba tinan oin mak hakarak fó atensaun nafatin ba moris di’ak povu nian iha área produtiva sira no ikus liu konektividade.

“Prosesu atividade programa hotu sei kontribui ba prioridade VIII Governu Konstitusionál ne’ebé mak ohin Primeiru-Ministru orienta katak labele sees husi prioridade hanesan bem estar, dezenvolvimentu setór produtivu no konektividade,” hateten Sekretáriu Estadu Merício Akara ba jornalista sira iha Palásiu Governu, kuarta ne’e.

Governante ne’e esplika katak bem estar  ne’e kona-ba asesu ba saúde, edukasaun, no reforsa no mós dezenvolve di’ak liután área produtiva sira, hahú husi setór primáriu, sekundáriu no tersiáriu.

“Liga ba setór primária hanesan agrikultura, peska no seluk tan atu fó atensaun no ministériu relevante bele dezenvolve di’ak liután. Nune’e mós liga ba sekundária ita fó atensaun ba industria petrolífera inklui manufatura no prosesamentu ba rekursu sira, enkuantu tersiáriu liga ba setór turizmu, finansa públika no servisu públiku,” katak sekretáriu estadu.

Nune’e mós konektividade liga ba oinsá dezenvolve infraestrutura portu, aeroportu, estrada inklui telekomunikasaun, internet, ne’ebé agora daudauk atu konsentra dezenvolve kabu submarinu no kabu terrestre para masimiza konektividade.

Governante ne’e akresenta,  ministériu ida bele halo atividade programa oin-oin maibé tenke konsentra ba prioridade, nune’e bele kontribui ba kreximentu ekonomia, hamenus ki’ak no kria kampu traballu.

Nune’e mós retiru ohin, maioria membru Governu hato’o progresu ne’ebé mak la’o até agora no iha difikuldade balun mak enfrenta maibé tamba ohin lidera direta husi Xefe Governu, tamba ne’e difikuldade mak ministériu enfrenta bele buka kedas solusaun no fó hanoin ba malu para ba oin bele hadi’a liután.

Tuir portál ofisiál governu, iha loron 27 no 28 juñu sei realiza semináriu “Jornadas Orsamentais” hodi hare di’ak liután kona-ba prioridade OJE 2020.

Kona-ba tetu fiskál ba OJE 2020 husi Ministériu Finansa sei diskute no aprova iha Konsellu-Ministru loron 10 jullu no Proposta OJE finál sei diskute no aprova iha reuniaun ezekutivu loron 18 setembru.

Nune’e iha loron 15 outubru 2019, Governu bele manda Proposta OJE 2020 ba Parlamentu Nasionál hodi bele diskute no aprova iha dezembru 2019.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here