Komisáriu Komisaun Anti Korrupsaun, Sérgio Hornay. Imajen/António Gonçalves

DILI, 29 maiu 2019 (TATOLI)—Komisáriu Komisaum Antí Korrupsaun (KAK), Sérgio Hornay, hateten atividade operasaun konjunta ne’ebé la’o iha loron sábadu no domingu atu diminui despeza.

“Neineik ita diminui ba iha  despeza no gastu ne’ebé mak la’ós nesesáriu,” Komisáriu Sérgio Hornay, ba jornalista sira hafoin audiénsia ho Komisaun A ne’ebé trata Asuntu Lei no Justisa, iha Parlamentu Nasionál, kuarta ne’e.

Komisáriu ne’e hateten, atividade pasa-revista ba utliziasaun patrimóniu Estadu kontinua nafatin ba oin.

“Operasaun konjunta ne’e hanesan serbisu rútina ida ne’ebé mak Komisaun Antí Korrupsaun ho ekipa transporte, polísia no mós PDHJ halo rutinamente iha semana halo vizilánsia no halo prevensaun ba iha utilizasaun patrimóniu Estadu, liliu ba iha motorizada no mós viatura sira,” Komisáriu KAK informa.

Ekipa ne’ebé mak involve iha operasaun konjunta ne’e ne’e mak hanesan Polísia Nasionál Timor-Leste (PNTL), Komisaun Antí Korrupsaun (KAK),Provedória Diretu Umanu no Justisa (PDHJ) no Diresaun Nasionál Patrimóniu Estadu (DNPE).

Komisáriu Sérgio esplika, ajente Estadu nian atu halo viajen tenke la’o ho justifikasaun bazeia ba órden serbisu, maibé nia seidauk simu relatóriu operasaun konjunta iha semana ida ne’e nian.

“Objetivu prinsipál hosi Komisaun Antí Korrupsaun ho entidade kompetente hakarak minimiza poténsia sira ne’ebé maka halai liu-ba iha krime pekulatu uzu, liliu utilizasaun patrimóniu Estadu nian,” nia esplika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here