Sekretáriu Estadu Ambiente (SEA), Demétrio de Amaral de Carvalho. Imajen/António Gonçalves.

DILI, 29 maiu 2019 (TATOLI)-Sekretáriu Estadu Ambiente (SEA), Demétrio do Amaral de Carvalho, hatete, memorandu entendimentu (MoU) ne’ebé asina ona ho empreza MURA Technology, fó dalan ba MURA no parseiru sira hanesan LICELLA no mós Universidade Sydney, hodi hahú buka rekursu.

“Sira hatete tiha ona katak sinál pozitivu hosi rekursu ne’ebé sira sei hetan hosi ajénsia balu, hosi nasaun balu, inklui hosi Amérika no sira sei uza uluk rekursu ne’ebé hetan hodi halo estudu viabilidade ida ba implementasaun indústria ne’e iha Timór. Depois estudu viabilidade ne’e sei fó informasaun ba ita di’ak liu, nune’e Timor-Leste ho empreza sira iha tempu sira iha oin, ita sei tama iha kontratu investimentu,” Sekretáriu Estadu, Demétrio informa, ohin, iha Otél Timór.

Nia esplika, kontratu investimentu ne’e sei halo bainhira Konsellu Ministru dala-ida tan avalia estudu viabilidade ne’ebé empreza ne’e sei aprezenta.

“Agora, akordu memorandu ne’e asina ona, empreza book an hela, sira hosi Universidade Sydney hein hela timoroan sira balu sei ba para halo capacity building hodi halo preparasaun no ha’u informa ona ba Primeiru-Ministru katak ita presiza hakat ida tan atu komesa haree selesaun ba joven sira atu haruka bá aprende daudauk teknolojia ne’e iha Sydney,” informa Demétrio.

Preparasaun ba joven ne’e sei haree tuir nesesidade tanba iha ona kompromisu husi kompañia atu simu.

Demétrio afirma sobre vantajen hosi memorandu ne’e tanba Governu labele tau osan halo buat hotu, tenke iha kriatividade no halo belun ho entidade ne’ebé iha interese no Timor-Leste iha sorte boot iha empreza MURA mai hodi sira-nia teknolojia liga ho Universidade Sydney ne’ebé iha teknolojia, sira hakarak atu oferese teknolojia ne’e mai Timor-Leste.

“Ne’e copyright sira fó hotu ba ita, sira-nia teknolojia maibé sira fó ba ita, ne’e di’ak ba ita atu sai nasaun ida ne’ebé konverte plástiku ba óleu, tenik Demétrio”.

Notísia relevante :http://www.tatoli.tl/2019/05/sea-asina-ona-memorandu-entendimentu-ho-empreza-mura/

Jornalista       : Maria Auxiliadora

Editór             : Francisco Simões

HAKEREK NO HATÁN

Please enter your comment!
Please enter your name here