Mellór markadór-sira. Imajen Mídia LFA

DILI, 28 maiu 2019 (TATOLI)—Jogadór nasionál timoroan ne’ebé maka joga iha Primeira Divizaun Liga Futeból Amadora (LFA) époka 2019, oras ne’e dadaun hatudu sira-nia kapasidade hanesan futebolista ho talentu ne’ebé tenki sura mós hosi jogadór estranjeiru sira.

Hosi istória lala’ok Liga Futeból Amadora, jogadór hosi estranjeiru maka sempre sai mellór markadór iha époka datoluk tutuir malu. Hahú iha tinan 2016, mellór markadór maka Patrick Wanggai (golu 10, nasionalidade Indonézia, hosi klube Karketu Dili FC.  Iha époka 2017, mellór markadór maka jogadór Tingga (golu 13), nasionalidade Brazíl, hosi klube Karketu Dili FC. Iha époka 2018, mellór markadór maka jogadór Fabio Cristian (golu 17) nasionalidade Brazíl, hosi klube Atlético Ultramar.

Lista mellór markadór to’o jornada datoluk ne’e sei lidera hosi jogadór estranjeiru Rafael Marti, hosi klube Boavista FC Timor.  Jogadór ho nasionalidade Brazíl ne’ebé sempre uza kamizola númeru 9 ne’e oras ne’e marka ona golu 5, hosi jogu tolu.

Maski nune’e, foin tama ba iha jornada datoluk maibé sira (jogadór timoroan) hatudu duni sira nia ambisaun atu bele tama iha lista mellór markadór iha époka ida ne’e. Jogadór timoroan, Edit Savio hosi klube Assalam FC, oras ne’e marka ona golu 4. Tuir kedas jogadór timoroan sira seluk ne’ebé maka marka ona golu tolu hanesan Silveiro Garcia hosi As Ponta Leste, Mouzinho Barreto (AD SLB), Yohanes Kapitan (Lalenok United FC) no Ismael Adam (Lalenok United FC).

Hanesan informasaun ne’ebé tatoli ona antes ne’e, jogu ba Primeira Divizaun jornada dahaat sei kontinua hikas iha loron sábadu (15/6/2019), hafoin selesaun nasionál fila hikas hosi jogu kualifikasaun Kopa Mundiál no Tasa AFC nian.

Lista provizóriu Mellór Markadór

Rafael Berti Marti (Boavista FC Timor) golu 5, Edit Savio (Assalam FC) 4,  Silveiro Garcia (AS Ponta Leste) 3, Mouzinho Barreto (AD SLB) 3, Yohanes  Kapitan (Lalenok United FC) 3 no Ismael Adam (Lalenok United FC) 3.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here