Plenária Parlamentu Nasionál. Imajen/António Gonçalves

DILI, 28 maiu 2019 (TATOLI) – Desizaun Ministériu Edukasaun Juventude no Desportu (MEJD) la estende funsionáriu kontratadu hamutuk 273, halo parte hotu sente preukupadu, liu-liu reprezentante povu sira iha Parlamentu naaionál (PN).

Deputada Carmelita Caetano Moniz husi Bankada CNRT konsidera termu kontratadu  ne’e haree ba ezijénsia kada ministériu nian, bazeia ba nesesidade maibé kuandu termu kontratu hotu no se ministériu ida laiha nesesidade atu kontinua, entaun nia obrigadu para.

“Problema mak se nesesidade ministériu nian mak presiza duni kontratu sira ne’e ba longo prazo (tempu naruk) será que ita atu husik de´it sira ba longo prazo? Ha´u karik konkorda  ho ministériu balun ne’ebé halo diagnostika hodi loke konkursu, hodi sira tuir konkursu no kuandu pasa sai ona funsionáriu públiku no iha garante ba nia moris,” hateten Deputada Carmelita Moniz, iha nia intervensaun iha plenária, tersa (28/05).

Nune´e mós, Deputada Virgínia Ana Belo husi Bankada CNRT reforsa, relasiona ho kontratadu ka permanente, nia konsidera membru governu anteriór mak sala tanba halo rekrutamentu no fó servisu ba funsionáriu sira.

“Tanba saida mak sira husik tiha situasaun ne’e la’o hela to’o agora no la fó kepastian (serteza) ba ema sira ne’e nia moris, loloos sira mak tenke responsabiliza,” friza deputada ne´e.

Tuir deputada ne’e, membru Governu agora halo saida mak tuir lei ho intensaun labele husik situasaun inserteza iha ema nia futuru, nune’e tenke halo konkursu duni hodi tau ema iha ninia funsaun.

“Labele Halimar Ho Ema-nia Vida”

Enkuantu, Deputada Ílda Maria da Conceição husi Bankada FRETILIN hateten, kontratadu iha edukasaun nia problema mak agora Ministra Dulce de Jesus soares atu hasai kontratadu na´in 273 no atu rekruta fali kontratadu foun.

“Tanba saida? se balun kontratadu tinan 10 no balun tinan 15 ona, hasai tiha fali ne’e atu kontrata foun. Se hanesan ne´e, hasai labele kontrata fali, tanba ita labele halimar ho ema nia vida. Sira kontratadu sira servisu fó han família iha uma laran,” lamenta membru órgaun lejislativu ne´e.

Tuir mai, Deputadu Adriano do Nascimento husi Bankada PD konsidera, kona-ba funsionáriu kontratadu ne’e, responsabilidade CNRT no PD tanba iha tempu ne’ebá tanba PD mak ukun.

“Ita labele halimar ho ema ne’ebé servisu tinan 10 resin ona no hasai atu rekruta tan foun. Rekruta foun signifika nesesidade Ministériu Edukasaun ne’e iha, tanba saida mak la uza ema ne’ebé servisu tinan 10 resin ona,” insiste reprezentante povu ne´e.

Lee mós notísia: http://www.tatoli.tl/2019/01/funsionariu-273-hosi-mejd-halo-protesta-tanba-la-kontinua-kontrata/

http://www.tatoli.tl/2019/05/ministra-dulce-laiha-tempu-ona-dialogu-ho-ema-nain-273/

http://www.tatoli.tl/2019/01/funsionariu-273-ho-kstl-sei-hasoru-mejd-buka-solusaun-ba-kontratu-la-extende/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here