Imajen motorizada polísia

DILI, 28 maiu 2019 (TATOLI)–Diresaun Nasionál Jestaun Patrimóniu Estadu (DNJPE), koordena ho Komandu Polísia Nasionál Timor-Leste (PNTL) Munisípiu Dili halo inspesaun ba karreta no motór polísia nian ne’ebé uza liu ona tinan lima ba leten sei halo leilaun ba interna no públiku.

Komandante Interinu Polísia Munisípiu Dili, Superintendete Assistente Polísia, Euclides Belo dehan, ekipa DNJPE halo inspesaun ne’e hodi buka hatene kondisaun karreta no motór Estadu nian ne’ebé membru PNTL uza barak maka aat ona presiza atu halo leilaun hodi sosa fila fali transporte foun.

“Iha munisípiu Dili rasik ita haree motór no karreta barak maka aat no kondisaun ladi’ak ona. Entaun, Patrimóniu Estadu mai haree transporte hirak ne’e kondisaun karik liu tinan lima ba leten tuir lei bele halo prosesu ba leilaun,” dehan Euclides ba jornalista iha edifísiu Komandu PNTL, Caicoli, Dili, ohin.

Iha inspesaun ne’e, nia tenik, ekipa DNJPE hareee uluk kondisaun motór 15 hosi Unidade Tránzitu, Ofisiál Polísia Suku (OPS) motór 10 no karreta balun komesa aat ona no balun sei kondisaun di’ak.

Maski la temi totál númeru karreta no motór ne’ebé Komandu PNTL Dili iha, maibé Komandante Euclides rekoñese karreta no motór barak aat durante hala’o serbisu operasaun.

“La lembra númeru loloos, maibé transporte barak maka aat ona. Karreta no motór uituan de’it mak sei di’ak,” nia informa.

Nia hatutan, karreta no motór hirak ne’ebé tuan ona dalaruma halo manutensaun gasta osan boot liu, tanba ne’e tenki halo leilaun hodi sosa fali transporte foun hodi poupa mós osan ba manutensaun.

Iha fatin hanesan, Xefe Koordenadór DNJPE, Salvador T.C Guterres haktuir motór no karreta sira ne’ebé aat sira sei rekolla hotu dadus depois sei halo avaliasaun hodi aprezenta fila fali ba governu maka sei foti desizaun halo leilaun.

Nia haklaken, ba motór no karreta ne’ebé di’ak, membru polísia sira bele uza ho kuidadu hodi ajuda Estadu paupa mós osan Estadu iha prosesu manutensaun.

Durante ne’e, Salvador informa, DNJPE halo inspesaun ba patrimóniu Estadu nian tomak ho objetivu atu ajuda governu halo poupansa osan Estadu nian no kontrola mós funsionáriu hotu-hotu bele uza sasán Estadu ho kuidadu ka labele estraga.

Jornalista: Eugénio Pereira

Editór: Xisto Freitas   

HAKEREK NO HATÁN

Please enter your comment!
Please enter your name here