Diretór Ezekutivu HNGV Aniceto Cardoso Barreto. Imajen/Egas Cristovão

DILI, 27 maiu 2019 (TATOLI) – Diretór Jerál Ospitál Nasionál Guido Valadares (ONGV), Aniceto Cardoso Barreto, hateten daudaun ne’e médiku espesialista estranjeiru ne’ebé hala’o kna’ar iha ONGV hamutuk na’in 150.

“Médiku Kubanu hamutuk 70 maka servisu iha ONGV, Xina 11, Austrália la permanente, daudaun ne’e médiku espesialista ne’ebé hala’o kna’ar iha Ospitál Nasionál Guido Valadares hamutuk 150”, hateten Aniceto Cardoso Barreto ba jornalista sira iha salaun Ministériu Saúde (MS), Kaikoli, ohin.

Aniceto esplika médiku estranjeiru hirak ne’e kuaze kobre iha área hotu, hanesan espesialista iha kardiolojista (moras fuan), urolojista (espesialista ba moras oioin ne’ebé trata mamiik), sirurjia (lala’ok ko’a ema nia isin), pediatria (trata moras ba labarik), no seluk tan. Aleinde ne’e apoia mós iha área radiolojia, laboratóriu, forensik.

Maske médiku espesialista iha ONGV sufisiente, maibé públiku kontinua preokupa, tan ne’e, lideransa ONGV ne’e subliña: “Ko’alia kona-ba kualidade ne’e ita ko’alia kona-ba padraun tratamentu, no labele kompara ospitál Timór ho ospitál iha rai li’ur”.

“Moras balu ami labele rezolve iha ospitál ninia indikasaun mai hosi ekipamentu balu iha seidauk bele responde ho di’ak, no moras ne’ebé dala ruma haruka ba tratamentu iha rai li’ur maka moras kankru”, katak tan.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here