Ministra Edukasaun Juventude no Desportu, Dulce de Jesus Soares. Imajen Tatoli/ Egas Cristóvão

DILI, 24 maiu 2019 (TATOLI)—Ministra Edukasaun, Juventude no Desportu, Dulce de Jesus, hateten regra disiplinár ba estudante no profesór-sira tenke balansu.

 “Iha kazu lubuk ida mak akontese iha eskola. Ami mós sei hasai dekretu governu ida kona-ba disiplina ba profesór-sira, maibé sei aplika regra ba alunu sira. Se lae mosu problema entre ami ho ami-nia profesór-sira dehan katak ministériu tau de’it disiplina ba profesór-sira, maibé alunu sira halo tuir sira-nia hakarak. Regra ne’e tenke balansu,” Dulce ba jornalista-sira bainhira lansa programa sosializasaun lei violénsia doméstika ba estudante-sira iha eskola Koléjiu São Miguel Arcanjo, Rai Kotu, Dili, ohin.

Ministra ne’e subliña, bainhira dekretu governu ne’e iha ona loke dalan ba kada eskola iha regra rasik. Iha regra ne’e tenke tenke konsensu entre profesór, estudante-sira no Konsellu Estudantil hafoin implementa regra ne’e.

Iha sosializasaun ne’e, ekipa hosi Unidade Polísia Vulnerável mak lori matéria kona-ba lei violénsia doméstika liliu ko’alia kona-ba violénsia iha eskola, violénsia iha uma no violénsia iha sosiedade.

Dulce konsidera katak sosializasaun importante tebes, tanba estudante-sira presiza iha koñesimentu natón kona-ba Lei Violénsia Doméstika.

 “Sosializasaun ne’e di’ak tebes tanba PNTL bele sensibiliza tipu violénsia-sira, nune’e violénsia labele akontese iha uma,” nia informa.

Ministra mós agradese ba PNTL liuhosi Unidade Polísia Vulnerável ne’ebé fahe matéria ne’e. “Profesór ho estudante presiza iha komunikasaun ne’ebé di’ak no se ita hakarak iha prosesu aprendizajen ne’ebé di’ak tenke aplika regra disiplina pozitiva ba alunu-sira,” tenik Dulce.

Iha biban ne’e, Komandante Jerál PNTL, Komisáriu Faustino da Costa esplika katak violénsia doméstika mai hosi tipu violénsia ka fatór haat (4) mak hanesan violénsia ne’e mai ho fiziku iha uma laran, violénsia seksuál, violénsia psikolojia no fatór ekonómiku hamosu violénsia doméstika.

Tuir nia, iha eskola, profesór-sira labele baku alunu-sira, maibé uza meiu seluk hodi hanorin alunu-sira. Nune’e mós ba inan ho aman-sira tenke ko’alia mamar ba oan-sira no hatudu dalan di’ak di’ak ba oan-sira tanba kuandu baku konsekuénsia boot tebes.

Iha sosializasaun ne’e partisipa hosi estudante-sira hosi eskola São Miguel Arcanjo, profesór no profesora-sira no mós reprezentante parseiru internasionál balun.

 Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here