Primeiru-Ministru, Taur Matan Ruak, Imajen Egas Cristovão

DILI, 23 maiu 2019 (TATOLI) – Enkontru semanál Primeiru-Ministru (PM), Taur Matan Ruak no Prezidente Repúblika, Francisco Guterres ‘Lú-Olo’, ko’alia kona-ba Komisaun Inkéritu Parlamentár (KIP) ne’ebé antes ne’e halo inkéritu ba projetu 143 ho totál orsamentu millaun US$345.

Primeiru-Ministru (PM), Taur Matan Ruak hateten, mezmu komisaun inkéritu parlamentár kaduka ona, maibé agora governu asume kna’ar atu haree oinsá mak bele rezolve problema sira ne’ebé mak liga ho infraestrutura.

“Govenu agora asume responsabilidade hodi haree oinsá mak regulariza, maioria tuir prosedimentu maibé balun la tuir prosedimentu, naturalmente governu sei buka solusaun,” tenik ba jornalista sira iha Palásiu Prezidente Nicolau Lobato, Bairru Pité, Dili, kinta ne’e.

Tuir Xefe Governu buat hirak ne’e tenke tuir regra ne’ebé governu iha ona, tanba ne’e presiza haree fali dadus loloos.

“Ita iha regras administrativa, prosesuál no legál ne’ebé ita tenke haree bazeia ba ida ne’e, ne’e mak prosesu ne’ebé ita sei halo estudu, dadus para hatene loloos ida ne’ebé mak la-kumpre, karik la-kumpre ne’e tanba saida, para depois ita haree oinsá bele hetan solusaun,” dehan tan.

KIP Konklui Ona Servisu

Komisaun Inkéritu Parlamentár (KIP) konklui ona servisu no iha loron 22 marsu,  komisaun ne’e entrega ona relatóriu ba meza atu lori ba debate iha plenária.

Dokumentu inkéritu parlamentár hamutuk 60 pájina, iha konkluzaun 34 no rekomendasaun 31.

Iha prazu loron 30 nia laran ne’ebé monu iha loron 22 abril, relatóriu KIP tenke lori ba plenária hodi debate. Maibé, tanba kestaun Bankada Governu no Bankada Opozisaun la hetan konsensu hodi aprova (laiha) relatóriu finál, nune’e relatóriu ne’e la-konsege lori ba plenária hodi debate.

Projetu 143, Laiha Kontratu Hamutuk 45

Antes ne’e, Ministru Obra Públika, Salvador Eugénio Soares dos Reis Pires, informa, Governu kontinua halo pagamentu ba projetu 143 ne’ebé mak iha kontratu, maibé ba projetu sira ne’ebé laiha kontratu sei hein rekomendasaun husi KIP.

Nia dehan, entre projetu 143 ne’e, projetu 45 mak laiha kontratu maibé iha dezembru tinan kotuk husi 45 aprova ona projetu hamutuk 15, tanba projetu hirak ne’e nia karakter urjénsia, ne’ebé aprezenta husi Ajénsia Dezenvolvimentu Nasionál (ADN), Komisaun Nasionál Aprovizionamentu (CNA-sigla portugés) no ajénsia relevante iha Konsellu Administrasaun Fundu Infraestrutura (KAFI) para hetan aprovasaun.

Ministru Salvador Pires hatutan, solusaun mak Governu iha KAFI mak haree ba projetu sira iha área fundu infraestrutura nian, maibé kuandu KAFI la konsege rezolve tenke lori ba Konsellu Ministru hodi haree no foti desizaun ba projetu sira ne’e.

Pedidu Bankada Opozisaun FRETILIN Estabelese KIP

Estabelesimentu KIP bazeia ba pedidu bankada opozisaun FRETILIN (Frente Revolucionária de Timor-Leste Independente) ne’ebé submete ona rekerimentu inkéritu parlamentár ba projetu hamutuk 143 ho montante millaun US$345 ne’ebé Konsellu Administrasaun Infraestrutura aprova iha loron 19 Jullu 2017.

Aprezentasaun rekerimentu ne’e husi xefe bankada FRETILIN, Aniceto Guterres, liuhosi intervensaun iha plenária loron 7 Setembru, hafoin PN aprova finál globál Orsamentu Jerál Estadu (OJE) 2018, ho intensaun atu investiga projetu hirak ne’e tuir lei ka lae molok governu halo pagamentu.

Tuir bankada FRETILIN nia haree katak, asinatura ba projetu hirak ne’e viola lei aprovizionamentu no lei jestaun finanseira, tanba momentu ne’ebá iha períodu governu jestaun, nune’e proibe asina kontratu ho kompañia sira.

Entretantu, membru KIP 11 kompostu husi deputadu husi bankada FRETILIN na’in haat, deputadu bankada CNRT (Conselho Nacional da Reconstrução de Timor) na’in tolu, bankada PLP (Partidu Libertasaun Popular) na’in rua, PD (Partidu Demokrátiku) no KHUNTO (Kmanek Haburas Unidade Timor Oan) na’in ida.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here