Ministru Justisa, Manuel Cárceres da Costa. Imajen/Antonio Goncalves

DILI, 23 maiu 2019 (TATOLI) – Governu liu hosi Ministériu Justisa (MJ) daudaun ne’e prepara hela ezbosu lei rua hanesan lei kadastru no lei rejistu prediál ou rejistu ba uma.

“Lei kadastru ne’e programa Servisu Nasionál Kadastrál (SNC-sigla portugés), rai sira ne’ebé laiha disputa governu bele fó ona sertifikadu, títulu ba rai na’in. Ezbosu lei kona ba rejistu prediál katak kona-ba uma, ne’e uma hot-hotu tenke rejistu, se lae maka halo uma sabraut de’it”, hateten Ministru Justisa, Manuel Cárceres da Costa, ba jornalista sira iha resintu Universidade da Paz (UNPAZ), Ai-mutin, ohin.

Governante ne’e esplika ezbosu lei kona-ba rejistu uma importante tebes, nune’e bele define fatin halo uma, zona komersiál, no fatin turístiku nian.

“Se lae maka tasi ibun mós ema ba halo hotu uma, ne’e ita atu ba hariis tasi karik iha ne’ebé”, katak.

Relasiona ho ezbosu sira ne’e, nia dehan, Primeiru-Ministru, Taur Matan Ruak, fó ona orientasaun katak tempu badak tenke submete ona ba Parlamentu Nasionál, tanba lei la’ós dekretu lei.

Tan ne’e, Cárceres promete sei aselera ezbosu lei rua ne’e, nune’e fulan-juñu tinan ne’e bele haruka ona ba parlamentu.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here