Uma Kain 12.323 iha Cailaco Seidauk Asesu ba Eletrisidade

CAILACO, 22 maiu 2019 (TATOLI)-Uma kain 12.323 iha suku neen (6), Postu Administrativu Cailaco, Munisípiu Bobonaro, to’o ohin loron seidauk asesu ba fornesimentu enerjia eletrisidade.

“Suku neen maka seidauk asesu eletrisidade, maibé Suku Purugoa ho Daudo  ne’ebé iha kedas villa asesu ona no  seluk seidauk tanba iha area remotas,” informa Administradór Postu Administrativu Cailaco, Alfredo Monis da Costa, iha Cailaco, Tersa (21/5/2019).

Postu Administrativu Cailaco iha aldeia 24 ho  suku 8, kompostu hosi Atudara, Goulolo, Genulai, Manapa, Meligo, Raiheu maka seidauk asesu eletrisidade, enkuantu populasaun uma kain besik atus tolu hosi Suku Daudo no Puruga asesu ona.

Postu administrativu area  luan 1.83.38 kilo metru kuadradu  ho total uma kain 2.467 ho total populasaun  12.579  kompostu hosi mane 6.178 no feto 5.944.

Alfredo Monis da Costa hatete, prosesu instalasaun ne’e atraza to’o ohin, tanba kontraktor lokál no veteranu sira antes ne’e ida-idak halo ona verifikasaun hodi foti dadus atu oinsá bele implementa projetu ne’e.

“Problema maka ida-idak ba sukat ona  no halo ona BoQ atu fornese ba  governu  sentrál hodi  ezekuta projetu ne’e,” Alfredo hatutan.

Nia hateten, governu lokál sei esforsu atu aselera prosesu instalasaun liña ba populasaun iha futuru hodi fornese ona eletrisidade ba populasaun.

Iha oportunidade hanesan, estudante  Martinho Soares  hosi Suku Purugoa hatete, ho problema la asesu eletrisidade difikulta komunidade atu asesu informasaun rai laran, liuhosi media eletrónika televizaun no rádiu, inklui   difikulta estudante atu estuda no impede komunidade atu halo negósiu.

“Iha tempu kalan ami sunu de’it lampu manual maibé labele aguenta atu estuda tanba suar maka’as provoka mear,”  Martinho Soares hateten.

Jornalista  : Agapito dos Santos

Editór        : Francisco Simões