Membru F-FDTL sira iha selebrasaun transformasaun FALINTIL ba FALINTIL-FDTL ba dala 18 iha Kuartel Jerál F-FDTL, Fatuhada. Imajen António Gonçalves

DILI, 22 maiu 2019 (TATOLI)–Ministériu Defeza hahú prepara ona orsamentu atu halo rekrutamentu ba membru FALINTIL-Forsa Defeza Timor-Leste (F-FDTL) foun hamutuk ema  na’in 600 liu iha tinan 2020 nia laran.

Tuir polítika governu nian, rekrutamentu membru forsa foun 600 ne’e atu kompleta númeru forsa F-FDTL ba 3600.

Diretór Jerál Ministériu Defeza, Armindo Moniz dos Santos dehan, tuir loloos rekrutamentu ba forsa foun sira ne’e hala’o tiha ona iha tinan 2019, maibé tanba problema tékniku entaun adia fali orsamentu rekrutamentu nian ba tinan 2020.

“Ita prevee mós orsamentu ba rekrutamentu ba forsa ne’ebé tuir ministru nia planu rekrutamentu sei hala’o iha tinan 2020 no to’o 2023 ne’e ita bele atinje númeru forsa to’o 3600,” Armindo ba Agênçia Tatoli iha salaun enkontru Ministériu Defeza Fatuhada, Dili, ohin.

 Nia informa, governu sei prevee de’it orsamentu no ba tékniku, maibé prosesu rekrutamentu ba forsa foun sei hala’o direta hosi Komandu F-FDTL hodi fó sai avizu ba joven feto no mane iha Timor-Leste.

 Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here