Prezidente Parlamentu Nasionál Arão Noé de Jesus da Costa Amaral. Imajen/Egas Cristovão

DILI, 20 maiu 2019 (TATOLI)– Parlamentu Nasionál (PN) sei konsidera pedidu hosi Prezidente Repúblika, Francisco Guterres Lú Olo, atu altera tiha lei númeru 5/2016 kona-ba indultu nian.

Prezidente Parlamentu Nasionál, Arão Noe de Jesus Amaral, ohin, iha Palásiu Prezidensiál,  Bairru Oite, Dili, hafoin partisipa komemorasaun loron restaurasaun independénsia ba da-XVII (20 maiu 2002-20 maiu 2019), mensiona katak, asuntu ne’e Prezidente Repúblika  foti ona iha audiénsia mensál, oinsá atu fó konspirasaun ba alterasaun lei númeru 5/2016 kona-ba indultu nian, nune’e parlamentu sei konsidera ida ne’e.

“Parlamentu sei konsidera pedidu Prezidente Repúblika nian, ami sei fokus hodi haree asuntu ida ne’e ho nesesáriu,” hateten Prezidente Parlamentu Nasionál Arão Noe de Jesus Amaral.

Tuir nia, Gabinete Prezidensiál adianta draft ida ba, bankada sira mós iha koñesimentu, hein katak bele halo konsiderasaun hodi halo alterasaun lei ne’e hodi ajusta tuir nesesidade rasik. Signifika, PR lei la fó dalan atu fó indultu ba dadur sira, lider órgaun lejizlativa iha V lejislatura ne’e hatán katak lei fó dalan maibé kabe ba PR tanba nia maka deteta pontu fraku sira no bele halo sujestaun ba parlamentu atu bele konsidera kuandu presiza.

Enkuantu, haree hosi Konstituisaun, artigu 85, Kódigu Penál no lei númeru 5/2016, 25 maiu, maka PR ezerse nia kompeténsia atu fó perdaun ba dadur sira. Ida ne’e signifika PR bele hakotu ka hamenus kastigu ne’ebé tribunál fó ona ba prizioneiru ne’ebé kumpre hela. Maibé, molok fó perdaun, PR tenke tetu situasaun kondenadu nian tuir lei haruka.

Lei dehan katak prizioneiru sira tenke kumpre ona pelu menus sentensa tersu ida, iha komportamentu di’ak no bele integra fali iha sosiedade, sei la sai ameasa ba sosiedade no sosiedade sei simu ho di’ak. Maibé, kritériu sira ne’e la implika krime organizadu no grave tebetebes hanesan terrorizmu, oho ema, tráfiku droga, korrupsaun no brankamentu kapitál, maibé bainhira iha razaun umanitária  ne’ebé autoridade sira komprova ona, PR bele fó perdaun tuir nia konsiénsia rasik kona-ba saida maka justu ba kazu ida-idak.

Tuir lei pedidu ida-idak tenke tuir prosedimentu atu komprova situasaun ne’ebé bele fó dalan atu hetan desizaun hosi PR, Tribunál Justisa, Prokuradoria Jerál Repúblika no tribunál kompetente, Ministru Justisa nu’udar reprezentante hosi governu maka tenke aprezenta prosesu tomak kona-ba pedidu indultu ba PR.

Entretantu, PR sira uluk bele fó indultu no komutasaun ba pena ne’ebé laiha limite. Maibé, agora ha’u halo limitasaun boot ho lei númeru 5/2016 ho nune’e PR labele fó indultu ba pena tuir nia hakarak rasik. Tanba ne’e iha tempu badak PR sei sujere ba PN atu halo alterasaun lei númeru 5/2016 atu bele fó dalan ba PR uza nia kompeténsia rasik iha Konstituisaun, artigu 85 ne’ebé previstu.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here