Atividade traballadór sira hili kafé iha Kooperativa Kafé Timor (CCT-sigla portugés), Bidau Akadiruhun. Imajen António Goncalves

ERMERA, 20 maiu 2019 (TATOLI)-Prezidente Autoridade Munisipál Ermera, José Martinho dos Santos Soares, hatete, Ermera poténsia tebes ba agrikultura ho Kafé no Kafé hanesan primadona (primeiru) Munisípiu Ermera nian.

“Ami hakarak hatete Kafé ne’e espesiál tanba kafé halo Timór nia naran koñesidu, Ermera koñesidu, maibé aléinde ne’e ita dezenvolve mós setór seluk iha agrikultura hanesan ortikultura no agora ita dezenvolve bambuu depois ita dezenvolve ai-fuan seluk tan no daudaun iha Ermera ho tulun hosi Governu, parseiru internasionál sira, ita halo hela buat sira ne’e,” Prezidente afirma, ohin, iha ámbitu komemorasaun loron restaurasaun independénsia ba da-17 iha kampu eis Pemda, Gleno.

Liga ba diskursu Prezidente Repúblika nian sobre produtividade Kafé ne’ebé ki’ik tebes, atubele organiza agrikultór hodi hasa’e produsaun Kafé nian tanba munisípiu ne’e poténsia boot ba produtu refere maka José Martinho dos Santos Soares hatete mudansa klimátika mak afeta ba kintál Kafé komesa menus.

“Iha ami-nia programa, ami nafatin fó apoiu no korajen ba ita-nia agrikultór sira nune’e kontinua kuda Kafé, kuda ai-mahon tanba Kafé sein ai-mahon ladún di’ak, entaun kuda Kafé ho mós ai-mahon no dezenvolve produtu ne’e ba nafatin tanba Kafé mak sai primadona agrikultór Ermera nian,” nia hatete.

Iha diskursu ba komemorasaun loron restaurasaun independénsia ba da-17 (20 maiu 2002-20 maiu 2019), Xefe Estadu, Francisco Guterres Lú Olo, iha ko’alia mós sobre diversifikasaun ekonomia liuliu mós ba Kafé nian.

“Ohin ha’u hakarak ko’alia liuliu kona-bá kafé, ita-nia produtu ida ne’ebé koñesidu iha mundu ho kualidade aas. Tuir dadus sensu 2015 no estudu seluk, uma-kain liu rihun tolunulu-resin-ualu mak prodús kafé no rihun tolunulu-resin-ualu mak kuda kafé ba konsumu rasik. Sensu ne’e mós hatudu katak kada uma-kain hetan dollar atus neen kada tinan husi fa’an kafé. Nune’e, ba kada tinan, uma-kain rihun tolunulu-resin-ualu, hamutuk, hetan rendimentu total dollar tokon ruanulu-resin-rua (millaun 22) kada tinan hosi fa’an kafé. Dadus hatudu katak kada agrikultór iha Timor-Leste prodús de’it kafé kilograma haat, loron ida,” esplika Prezidente Repúblika Francisco Guterres Lú Olo.

Iha nasaun Costa Rica, agrikultór ida prodús kafé kilograma ruanulu, loron ida. Ida ne’e hatudu katak TL-nia produtividade sei ki’ik tebes kompara ho nasaun-sira seluk. Se TL haburas indústria kafé iha rai-laran no hasa’e ninia kualidade, produsaun no produtividade, bele hetan rendimentu aas liu no beibeik hosi merkadu internasionál.

Foin lalais ne’e Universidade Monash Austrália halo estudu ida ne’ebé hatudu katak, se TL investe dollar tokon atus ida limanulu-resin-haat iha área kafé, sei loke oportunidade servisu ba ema hamutuk rihun hitunulu-resin-hitu no, sei fó kontribuisaun reál ba ita-nia produtu internu brutu, hamutuk dollar biliaun hitu-resin to’o tinan 2050.

“Ho laran-ksolok mak ha’u akompaña katak, parte hotu-hotu ne’ebé envolve iha indústria kafé, hahú husi produtór, kompradór iha rai-laran no ka esportadór, nu’udar individuál ka kompañia, harii ona “Asosiasaun Café Timor-Leste”. Asosiasaun ne’e fó hela formasaun ba ita-nia produtór sira oinsá tau-matan ba kafé atu labele lakon kualidade. Ho esforsu, iha Asosiasaun ne’ e, husi parseiru dezenvolvimentu boboot, hanesan Cooperativa Café Timor-Leste, Timor Global, OLAM, ATT, GCC-Timor-Leste, PARCIC no Peace Win, ha’u fiar katak valór kafé Timor-Leste nian sei sa’e ba beibeik”.

Jornalista   : Maria Auxiliadora

Editór          : Francisco Simões

HAKEREK NO HATÁN

Please enter your comment!
Please enter your name here