Ministru Interiór Interinu, Filomeno da Paixão de Jesus. Imajen António Goncalves

DILI, 21 maiu 2019 (TATOLI) – Ministru Defeza no Seguransa Interinu, Filomeno da Paixão de Jesus, hateten atu mantein seguransa interna no esterna di’ak liután maka forsa rua hanesan FALINTIL-Forsa Defeza Timór-Leste no Polísia Nasionál Timór-Leste (PNTL) kompleta malu. 

“Ita hotu hatene katak forsa rua ne’e atu kompleta malu, tantu interna no esterna. Relasiona ho akontesimentu ida katak membru Batallaun Orden Públiku (BOP) baku fali ha’u nia seguransa, ha’u bolu ona komandante polísia na’in rua, ha’u dehan hahalok ne’e tenke para, ba oin ha’u sei haree lei, liuliu disiplina polísia nian”,  hateten Filomeno da Paixão de Jesus ba jornalista sira iha Palásiu Prezidente Bairru Pité, hafoin enkontru semanál ho Prezidente Repúblika, Francisco Guterres Lú Olo, ohin.

Tuir Filomeno nia haree durante ne’e forsa rua ne’e ninia komportamentu ladi’ak iha intervensaun seguransa iha terrenu.

Relasiona ho komportamentu ladi’ak hosi Unidade Espesiál Polísia (UEP), sub-unidade BOP ne’e, Ministru Interiór Interinu ne’e apela ba membru PNTL, liuliu BOP atu hatudu profisionál.

Maske nune’e, Filomeno dehan: “Ha’u la ko’alia sobu, hamenus ou aumenta unidade iha PNTL rasik, maibé iha revizaun ba lei orgánika Polísia nian maka sei haree, hanesan ha’u hateten ona atu haree prinsípiu rasionalizasaun, prinsípiu komplementariedade no prinsípiu subsidiariedade katak forsa rua (polísia no militár) ne’e ida bin no ida alin, ne’ebé F-FDTL maka bin no PNTL mak alin, tenke kompleta malu”.

Filomeno hatutan daudaun ne’e simu ona Regulamentu Disiplinár Polísia nian (RDP).  “Komandu PNTL submete ona Regulamentu Disiplinár Polísia ba ha’u, no ha’u kurisi ona, no haruka fila ba sira. Tuir fali mai maka lei orgánika PNTL nian, iha lei orgánika ne’e maka ko’alia kona-ba polísia nia misaun, ekipamentu, infraestrutura no formasaun, pontu hirak ne’e importante liu, nune’e labele iha sobre pozisaun ho forsa armada”.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here