Komandante PNTL Munisípiu Bobonaro, Superintendente Xefe Polisia, Armando Monteiro. Imajen/Agapito dos Santos

CAILACO, 20 maiu 2019 (TATOLI)-Hosi apreensaun sasán ilegál iha liña fronteira terrestre nian iha tinan 2019, Polisia Nasionál Timor-Leste (PNTL) Munisípiu Bobonaro, konsege rekolla osan ho montante rihun US$70 hodi kontribui ba reseita Estadu.

Evidensia mina-rai ilegá ne’ebé PNTL Munisípiu Bobonaro prende iha fronteira terrestre. Imajen/PNTL Bobonaro

Komandante PNTL Munisípiu Bobonaro, Superintendente Xefe Polisia,  Armando Monteiro hatete, sasán hirak ne’ebé PNTL prende hosi atividade komersiu ilegál, hanesan kombustivel (mina-rai no gazolina), tabaku (sigarru) no sasán nesesidade báziku seluk.

“Hahú janeiru too loron 19 maiu, ita prende mina tonelada 100, tabaku (sigarru) no mós sasán seluk ho valór ne’ebé kalkula ba osan rihun US$70,” hateten Superintendente Xefe, Armando Monteiro,  horiseik, ba Ajénsia TATOLI, iha Cailaco, Bobonaro.

Sasán hirak ne’ebé PNTL Bobonaro prende ne’e prosesa no hodi entrega ba ministériu públiku atu foti desizaun bazeia ba lei aplikasaun multa no leilaun.

Rezultadu apreensaun sasán ilegál hosi komunidade nee akontese iha area fronteira Maliana, Balibo Motain no Alto Lebos. Tanba ne’e, Komandu PNTL Munisípiu Bobonaro kontinua esforsu atu halo prevensaun no kombate atividade hirak nee hodi aumenta movimentu no patrullamentu iha liña fronteira.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here