Merkadu Munisípiu Bobonaro. Imajen/dok.google

CAILACO, 20 maiu 2019 (TATOLI)-Iha tinan oin mai, Autoridade Munisípiu Bobonaro, tau prioridade ba reabilitasaun no konstrusaun  infraestrutura estrada.

Liuhosi planu autoridade Munisípiu Bobonaro nian ne’ebé relata ba Governu sentrál atu implementa iha tinan oin mak projetu infraestrutura bázika hamutuk 34 iha area edukasaun, saúde, bee mós, irrigasaun, estrada no seluk tan.

“Ami iha nee ezije liu estrada tanba Munisípiu Bobonaro hahú kedas estrada urbana ne’ebé liga ho munisípiu seluk mós sei at, estrada munisípiu ne’ebé liga ho postu seidauk hadi’a tanba too agora ita halo de’it manutensaun simples no seidauk tuir padraun estrada nasionál,” hatete Prezidente Autoridade Munisípiu Bobonaro, Jeferino Soares dos Santos, horiseik, ba Ajénsia TATOLI iha Cailaco, Bobonaro.

Nia dehan, postu administrativu Bobonaro, Cailaco, no Lolotoe, sei enfrenta problema estrada. Enkuantu, ba planu reabilitasaun ne’ebé sai prioridade mós mak, irrigasaun II iha Maliana, irrigasaun iha Marco no irrigasaun Bilimau iha Cailaco,  irrigasaun Alekou, irrigasaun Nunura no seluk tan.

Nia dehan, irrigasaun Maliana I maka oras nee fornese bee ba natar komunidade hamutuk ektare 2.550.

Jeferino Soares dos Santos, hatete,  planu konstrusaun infraestrutura ho montante orsamentu boot labele tau iha planu dezenvolvimentu integradu munisipál nain.

“Projetu ne’ebé ami bele halo maka ho nia osan menus hosi rihun US$150.  Ba projetu ho osan boot, konsentra ba governu sentrál, porezemplu konstrusaun ponte ho distánsia menus hosi metru sanulu  se liu nee responsabilidade governu sentrál. Iha edukasaun, ami toma konta de’it programa merenda eskolár, eskola infantíl, ensinu rekorrente, maibé ensinu báziku too superior nee governu sentrál,” esplika Jeferino Soares dos Santos.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here