Reprezentante OMS iha Timor-Leste, Rajesh Pandav. Imajen mídia PN

DILI, 16 maiu 2019 (TATOLI) – Relatóriu Organizasaun Mundiál ba Saúde (OMS) iha 2018 haktuir joven sira ho idade 13 to’o 17 konsumu alkol.

“Porsentu 17 hosi totál populasaun Timór, mane hamutuk porsentu 42 maka konsumu alkol no hosi feto porsentu rua hosi idade 15 ba leten”, reprezentante OMS iha Timor-Leste, Rajesh Pandav, ba TATOLI iha Parlamentu Nasionál hafoin fahe informasaun ba Komisaun F PN ne’ebé trata asuntu Saúde, Seguransa Sosiál no Igualdade Jéneru.

Rajesh Pandav hatutan: “Iha mós survey ba estudante sira iha eskola ho idade 13 to’o 17. Dadus hatudu katak porsentu 25 ba labarik mane sira no porsentu sia ba estudante feto”.

Hosi survey ne’e, nia afirma idade hosi 13 to’o 17, porsentu 69 konsumu alkol.

Atu redús maka OMS fó apoia ba Ministériu Saúde oinsá dezenvolve estratéjia ba kontrola moras la hada’et inklui mós alkol.

“Estratéjia ida atu redús maka setór hot-hotu kona-ba prevensaun no kontrolu ba moras la hada’et. Estratéjia ne’e rasik define hanesan tenke hamosu polítika ba kontrolu alkol, depois tenke iha lei kona-ba bandu alkol, no tenke hasa’e taxa importasaun ba alkol”, akresenta.

Tuir nia haree situasaun daudaun ne’e kompañia sira fa’an alkol barak tebes, halo promosaun barak iha fatin ne’ebé ema barak asesu hanesan Timor-Plaza, iha sinema ruma, no liu-liu fó deskontu kona-ba fa’an alkol.

Reprezentante OMS ne’e hatutan dalan seluk ne’ebé uza hodi promove alkol maka eventu merkadu kalan (nigh market) hosi mídia sosiál. Ho dalan sira ne’e fasil ba labarik sira atu konsumu alkol.

Nia subliña impaktu hosi konsumu alkol ne’e barak tebes, dadus hatudu moras besik 200 kauza hosi konsumu alkol maka aten kanek, moras korasaun, moras mentál, ligadu mós ba asidente tráfegu.

Nune’e tuir dadus MS nian besik porsentu 18 mate ligadu ho moras aten boot tanba konsumu alkol. “Ami sei apoia polítika ministériu saúde hodi kontrola alkol, no parlamentu rasik sente katak importante atu hasa’e taxa ba alkol no atu asegura katak laiha tan sirkulasaun arbiru maka sei iha regulamentu”.

Papél OMS nian iha TL maka ajuda governu Timór-Leste hodi rezolve problema saúde hodi atinje saúde di’ak ba povu.

Komisaun F Parlamentu Nasionál (PN) ne’ebé trata asuntu Saúde, Seguransa Sosiál no Igualdade Jéneru planeia kria lejizlasaun ida sobre sirkulasaun alkol ne’ebé ninia impaktu direta ba joven sira ho idade 13 to’o 17.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here