Organizasaun Mundiál Saúde (OMS) fahe informasaun kona-ba impaktu konsumu alkol ba Komisaun F Parlamentu Nasionál ne’ebé trata asuntu Saúde, Seguransa Sosiál, no Igualdade Jéneru. Imajen mídia PN

DILI, 16 maiu 2019 (TATOLI) – Organizasaun Mundiál Saúde (OMS) fahe informasaun kona-ba impaktu konsumu alkol ba Komisaun F Parlamentu Nasionál ne’ebé trata asuntu Saúde, Seguransa Sosiál, no Igualdade Jéneru.

Prezidente Komisaun F, deputada Maria Barreto, hateten objetivu soru-mutu ne’e atu oinsá membru komisaun sira iha koñesimentu hodi hamosu lejizlasaun kona-ba sirkulasaun alkol iha rai-laran.

“Ami haree katak presiza tebes iha asaun ida hodi prevene no mós proteje, li-liu ba futuru jerasaun Timor nian”, hateten deputada hosi bankada Kongresu Nasionál Rekonstrusaun Timor (CNRT-sigla portugés) ne’e ba TATOLI iha salaun Grupu Feto Parlamentu Timor-Leste (GPMTL-sigla portugés), ohin.

Maria Barreto hatutan tuir dadus hosi OMS populasaun Timór porsentu 18 mate tanba de’it konsumu alkol.

Ho informasaun ne’ebé partilla husi OMS maka deputadu sira, liuliu komisaun F tau ona importánsia atu kria regulamentu ida hamutuk ho Ministériu Saúde hodi kontrola di’ak liu tan alkol.

“Iha parte seluk mós konsumu alkol maka’as afeta mós ba prosesu dezenvolvimentu, li-liu ba ema nian saúde no moris sosiál no vida ekonomia iha nasaun ida ne’e”, afirma.

Haree husi pontu importante tolu ne’e, nia afirma Timór-Leste presiza iha polítika ida hodi prevene importasaun alkol no tua sabu sira ne’ebé prodús rasik husi komunidade.

Iha fatin hanesan, reprezentante OMS iha Timór-Leste, Rajesh Pandav, hateten atu regulariza alkol presiza duni lei, atu kontrola sirkulasaun alkol iha rai-laran.

“Ami mai fahe informasaun ba deputadu sira, komisaun F kona-ba impaktu alkol ba saúde populasaun Timór-Leste, tanba tuir dadus husi OMS rasik katak porsentu 17 husi totál populasaun Timór, mane hamutuk porsentu 42 mane maka konsumu alkol no feto porsentu rua husi idade 15 ba leten”, hateten Rajesh Pandav.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here