Ministru Defeza (MD), Filomeno da Paixão de Jesus. Foto António Gonçalves

DILI, 15 maiu 2019 (TATOLI)—Ministru Defeza no Ministru Interiór Interinu, Filomeno da Paixão de Jesus, hateten desizaun koletiva Konsellu Ministru (KM) mak bele foti desizaun sosa arma (pistola) ba  Polícia Científica de Investigação Criminal (PCIC).

“Ita hotu bele tetu hotu katak bele lori pistola ka lae. Ami sei túr hamutuk oinsá haree ba ida ne’e. Konsellu Ministru mak sei desidi PCIC ne’e lori pistola ka lae. Se Konsellu Ministru dehan lori pistola, ita implementa de’it,” Filomeno ko’alia ba jornalista sira iha Palásiu Governu, kuarta (15/5/2019).

Ministru Defeza ne’e esplika, importánsia hosi PCIC nian boot tebes ba Estadu no bele kria norma hafoin PCIC bele la’o ho arma.

Nia dehan, krime balun Polísia Nasionál Timor-Leste (PNTL) la konsege identifika ho detallu, tanba krime balun sufistifikadu demais ka la konsege identifika, entaun presiza polísia ida ne’ebé ho espesialidade.

Eis Vise Xefe Estadu Maior Jenerál F-FDTL ne’e hateten, nia prontu ajuda PCIC nune’e bele la’o di’ak liu-tan iha futuru.

“Arma ita iha. Ita la presiza sosa-tan, maibé ita presiza haree fali ita-nia regulamentasaun halo nusa. Se iha duni nesesidade ita bele halo,” nia afirma.

 Jornalista: Evaristo Soares Martins

 Editór: Xisto Freitas

 

 

 

 

HAKEREK NO HATÁN

Please enter your comment!
Please enter your name here