Membru Deputada CNRT Maria Terezinha da Silva Viegas (Loos) Xefe Bankada CNRT Duarte Nunes(Klaran) Xefe Bankada PLP Cornélio da Conceição Gama “L-7” (Klaran) Membro Deputada CNRT Maria Fernanda Lay (Karuk) halo konferénsia imprensa iha sala Bankada CNRT, Kuarta (15/5/2019). Imajen/Egas Cristovão

DILI, 15 maiu 2019 (TATOLI) – TIMOR GAP nu’udar Empreza Públika ne’ebé simu fiar hosi Governu atuál atu halo meius hotu hodi dada kadoras greater sunrise mai Beaço, Munisípiu Viqueque, nune’e maka Aliansa Maioria Parlamentár (AMP) husu ba timoroan hotu atu apoia ba interese Estadu nian tanba bele fó benefísiu ba timoroan tomak.

“Estratéjia saida de’it maka TIMOR GAP halo atu hahú dada kadoras, tanba ne’e presiza hothotu nia apoiu atu ba oin bele fó benefísiu ba timoroan tomak”, deklarasaun konjunta AMP nian liuhosi konferénsia imprensa, ohin, iha  Bankada CNRT, Parlamentu Nasionál.

Tuir planu iha 2025 to’o 2026, greater sunrise sei halo produsaun, sé hahú produsaun maka sei hatama reseita, nune’e maka TIMOR GAP iha kbiit atu selu hikas empréstimu ne’ebé hetan hosi Banco Central Timor-Leste (BNCTL).

AMP haree hosi preokupasaun Prezidente Repúblika, Francisco Guterres “Lu-Olo” no Bankada FRETILÍN kona-ba atu foti osan labele uza osan Fundu Petrolífera, hakarak ka lakohi, TIMOR GAP tenke buka parseiru hodi investe iha atividade petrolífera ne’ebé tuir planu hahú iha 2019.

Esforsu TIMOR GAP nian ne’ebé lidera hosi Xefe Negosiadór, Kay Rala Xanana Gusmão halo duni, ikus mai bele hetan ona parseiru ida ne’ebé oferese an atu harii Portu ida iha Beaço, projetu konstrusaun portu ne’e, tuir estudu hosi TIMOR GAP halo ona ho empreza Británika ida hamosu estimasaun kustu billaun US$1,4. Empréstimu ne’ebé hetan hosi akordu komersiál ho China Civil Engineering Construction Corporation (CCECC) hamutuk millaun US$940 ne’ebé sei re-embolsa bainhira TIMOR GAP hetan ona osan hosi esplorasaun Greater Sunrise. Tanba ne’e maka Deputadu AMP sira fó apoiu tomak ba TIMOR GAP atu foti desizaun estratéjiku hodi bele lori vantajen no benefísiu mai Timor-Leste.

AMP komprende katak akordu komersiál entre TIMOR GAP ho China Civil Engineering Construction Corporation nu’udar akordu kontinuasaun ne’ebé governu halo ona akordu iha 2017. Akordu hirak ne’e hanesan meius atu bele buka parseiru no finansiamentu ba projetu tasi mane, tanba Woodside dehan ona katak sira sei la investe iha Beaço.

Alem de ne’e, esforsu TIMOR GAP ba akordu komersiál la uza osan Estadu nian, tanba governu evita uza osan Fundu Petrolíferu atu selu kontratu, maibé investimentu hosi China no sei selu liuhosi rendimentu produsaun hosi projetu Greater Sunrise.

AMP preokupa tebes ho osan Fundu Petrolíferu ne’ebé tun beibeik, ho despeza Estadu millaun US$1,500 tinan-tinan. Tinan 10 mai, osan iha Fundu Petrolíferu bele hotu, sé nune’e Timor-Leste atu moris ho orsamentu hosi ne’ebé, sé reseita doméstika de’it la to’o millaun US$200 la bele sustenta Estadu nia moris. Tanba ne’e maka AMP apoia esforsu VIII Governu, TIMOR GAP hodi dezenvolve mina matan hodi hatama osan ba Fundu Petrolíferu iha tempu badak, nune’e bele iha sustentabidade ba dezenvolvimentu ekonómiku no finanseiru ba longu prazu.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here