Sekretáriu Estadu Protesaun Sivíl (SEPS), Alexandrinho de Araújo, promove Superintendente Asistente Polísia, Ismael da Costa Babo sai nu’udar Diretór Jerál Servisu Operasionál no Protesaun Sivíl no Albano Salem asumi kargu Diretór Nasionál Protesaun Sivíl (DNPS), segunda (13/05). Foto: Servisu Relasaun Públika

DILI, 14 maiu 2019 (TATOLI)—Sekretáriu Estadu Protesaun Sivíl (SEPS), Alexandrinho de Araújo promove Superintendente Asistente Polísia, Ismael da Costa Babo sai nu’udar Diretór Jerál Servisu Operesionál no Protesaun Sivíl (DJ-SOPS) no Albano Salem asumi kargu Diretór Nasionál Protesaun Sivíl (DNPS).

Serimónia entrega servisu hala’o liuhusi asina akordu hosi diretór sesante DJ-SOPS, Domingos Pinto ba Ismael da Costa Babo no diretór sesante DNPS, Cândido Gusmão ba Albano Salem iha edifísiu protesaun Sivíl, Caicoli, Dili, segunda (03/05).

Antes ne’e, Isamael Babo nu’udar Diretór Diresaun Nasionál Seguransa Rodoviária (DNSR) no Albano Salem nu’udar Diretór Nasionál Formasaun Profisionál (DNAFOP) iha Sekretaria Estadu Formasaun Profisionál no Empregu (SEFOPE).

Nomeasaun ne’e hala’o bazeia ba despaixu Komisaun Funsaun Públika (KFP) númeru 3162/2019, loron 5 Abril 2019, tuir pedidu ne’ebé hato’o hosi SEPS númeru 59 Gabinete SEPS loron 29 Abril 2019 hodi troka diretór sesante rua ne’e.

Antes entrega podér servisu, Diretór sesante DJ-SOPS, Domingos Pinto hahú ho introdusaun jerál prosesu harii SOPS iha loron 1 agustu 2005, iha ne’ebé nia hahú hala’o servisu ho funsionáriu na’in lima mai hosi siguransa sivíl ho nível rua ema na’in haat (4) no nível ida ema na’in ida (1).

To’o ohin loron, SOPS iha funsionáriu mestradu kualifikadu hamutuk ema na’in 106 liu ho ekipamentu servisu ne’ebé sufisiente bele dezenvolve SOPS ho di’ak.

“Tinan 14 liu-ba ha’u lidera instituisaun ne’e, hahú zero. Ohin loron ha’u fiar protesaun sivíl iha ona rekursu mestradu sufisiente atu hala’o servisu ba oin,” dehan Domingos.

Nia husu atu diretór foun Ismail  atu kontinua apoiu no dezenvolve servisu liliu estabelese tan ekipa Bombeiru to’o Munisípiu haat maka hanesan Ermera, Ainaro, Manatuto no Liquiça.

Tuir nia, agora dadaun kondisaun karreta Bombeiru ba Dili, Aileu, Baucau, Ainaro no Maliana barak maka aat ona, tan ne’e presiza prevé osamentu hodi sosa tan karreta no ekipamentu foun.

Domingos mós rekomenda ba governu atu kontinua harii tan estasaun Bombeiru neen hanesan iha Dili oeste (Comoro), Batugade, Maubisse, Liquiça, Atauro no Beaço (Viqueque) iha futuru hodi prepara ba dezembarke matérial konstrusaun tantu gazoduto, ne’ebé sei lori gás natural hosi kampu petrolíferu greater sunrise nu’udar unidade ida ba prosesamentu Gás Natural Liquefeito (GNL).

Mensajen importa seluk mak, Domingos husu atu funsionáriu sira unidade nafatin no labele fahe malu tanba de’it selok malu ba kna’ar ida.

“Tinan 14 ha’u la hanorin imi atu fahe malu no atu selok malu. Mai ita hamutuk haree malu servisu ne’e ba oin,” nia apela.

Iha fatin hanesan, Diretór sesante DNPS, Cândido Gusmão deklara prontu koopera ho Seketáriu Estadu ho diretór foun Albano atu dezenvolve servisu DNPS.

Cândido rekoñese durante tinan neen (6) lidera DNSP hasoru obstáklu no problema barak seidauk rezolve, maibé konsege prodúz ona servisu barak.

 “Durante tinan lima liu, buat barak ami hala’o ona no buat barak mós seidauk konsege halo. Ha’u espera diretór foun bele kontinua hadi’a liu-tan,” nia hateten.

Nia rekomenda ba Sekretáriu Estadu, Alexandrinho atu kontinua dezenvolve kooperasaun servisu ne’ebé DNPS hala’o ona ho Autoridade Governadór Nusa Tenggara Timur (NTT).

Entretantu, Direitór Jerál Servisu Operesionál no Protesaun Sivíl (DJ-SOPS), Ismael da Costa Babo hato’o agradese no prontu koopera nafatin ho diretór sesante no funsionariu sira atu servisu.

Babo lakohi hato’o promesa saida maka tenki halo uluk, maibé tuir nia prinsípiu katak bainhira promesa hanesan liafuan tusan todan ida, tanba ne’e nia hakarak servisu de’it rezolve dezafiu sira ne’ebé iha.

“Buat ida promete ne’e tusan. Di’ak liu ita hamutuk halo servisu mak ita haree,” nia afirma.

Nia hatutan, programa ne’ebé nia sei halo mak hadi’a jestaun rekursu no jestaun utiliza fasilidade Estadu tenki la’o tuir regra hodi dezenvolve servisu SOPS.

Parte seluk, Sekretáriu Estadu, Alexandrinho dehan, desizaun troka diretór sesante Domingos no Cândido hodi promove fali ba kna’ar foun iha fatin importante maka Forum Rejionál ASEAN ho Forum CPLP tanba sira na’in rua hanesan patrimóniu Estadu iha koñesimentu kle’an bele kria liña kooperasaun ho nasaun internasionál.

Alexandrinho rekoñese, líder antigu rua ne’e dezempeña sira-nia papél dezenvolve SOPS-DNSP ho dezafiu to’o nia asumi kna’ar polítika SEPS mai kontinua dezenvolve tutan servisu ba oin.

“Imi rua lidera iha situasaun ne’ebé difísil. Ha’u husu deskulpa. Ha’u la’ós hasai imi, maibé muda de’it pozisaun. Imi rua sei hamutuk ho ha’u to’o tinan lima,” nia hateten.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here