Diretór Klínika Óspital Nasionál Guido Valadares (ONGV), Flavio Brandão. Imajen hosi FB Flavio Brandão

DILI, 13 maiu 2019 (TATOLI) – Diretór Klínika Óspital Nasionál Guido Valadares (ONGV), Flavio Brandão, hateten governu liuhusi Ministériu Saúde planeia estabelese sentru tratamentu ba moras kankru iha Timór.

Flavio Brandão haktuir durante ne’e pasiente moras kankru la halo tratamentu iha ONGV, maibé transfere ba rai-liur.

“Planu VIII Governu Konstitusional fó atensaun mós ba oinsá estabelese sentru tratamentu moras kankru iha Timór. Prioridade tinan ne’e, ne’ebé ami agora haka’as-án oinsá opsaun ba diagnostiku, nune’e tratamentu tenke akontese iha rai-laran. Durante ne’e pasiente moras kankru transfere de’it ba rai liur, tanba fasilidade no aimoruk rasik ita nian laiha”, dehan Brandão ba TATOLI iha Otél Novo Turizmu, ohin.

Brandão rekoñese durante transfere pasiente moras kankru ba rai liur hamosu gastu maka’as no la fó benefisiu ba governu, liu-liu pasiente sira. Tanba ne’e planeia ona atu 2020 hapara transferénsia pasiente moras kankru ba rai liur.

Dadaun ne’e ONGV komesa ona servisu faze dahuluk maka haree modalidade diagnostiku, infraestrutura ho diagnostiku histopatología no laboratóriu.

Alende ekipamentu no aimoruk, nia dehan médiku ba moras refere la sufisiente.

Jornalista: Antónia Gusmão

Editora: Rita Almeida

Maioria Pasiente Kankru Mate Tanba Laiha Detesaun Sedu

 

HAKEREK NO HATÁN

Please enter your comment!
Please enter your name here