Diretór Ezekutivu PERMATIL, Ego Lemos, hafoin sorumutu ho Sekretáriu Estadu Komunikasaun Sosiál iha Palásiu Governu, Kinta (9/5/2019). Foto António Gonçalves

DILI, 09 maiu 2019 (TATOLI)—Diretór Ezekutivu Permakultura Timor-Leste (PERMATIL), Eugénio ‘Ego’ Lemos, hateten joven barak  hili dalan ba serbisu iha rai-li’ur tanba Timor-Leste laiha poténsia ba kampu serbisu.

 “Ita iha rekursu ne’ebé sufisiente fó kampu serbisu ba ita-nia joven sira. Ita mós nasaun agraria, maibé ita-nia joven produtivu sira prefere sai hosi suku, aldeia, knua mai hamutuk iha Dili. Barak mak sai ba rai-li’ur, tanba sira haree katak Timor laiha poténsia atu kria kampu serbisu,” nia tenik ba jornalista sira bainhira partisipa iha enkontru troka ideia atu halo revizaun ba kurríkulu edukasaun iha salaun Ministériu Edukasaun, Juventude no Desportu, Vila-Verde, kinta (9/5/2019).

Tuir nia, fenómena ne’ebé akontese iha Timor-Leste mak tékniku vokasionál no sekundáriu jerál, tinan-tinan prodúz graduadu rihun ba rihun, maibé la kongese hatán ba dezempregu iha rai-laran.

“La’ós katak serbisu iha ita-nia rain laiha, maibé problema mak ita-nia sistema edukasaun, liuliu matéria sira ne’ebé ita hanorin ba estudante sira barak mak la relevante ho ita-nia área rurál sira,” Ego subliña.

Tanba ne’e, nia sujere, governu liuhosi Ministériu Edukasaun, Juventude no Desportu presiza halo revizaun ba ensiñu sekundáriu jerál no tékniku vokasionál.

Ego Lemos fó ezemplu estudante sira iha tékniku vokasionál agrikultura nian, ladún apriende matéria orgánika ne’ebé mak iha hodi prodúz adubu orgániku no mós halo selesaun fini, aprezenta buat ne’ebé kontribui ba dezenvolvimentu sustentável nasaun nian.

Ho ideia hirak ne’e, governu liuhosi ministériu edukasaun konvida Ego Lemos tau ideia hamutuk hodi halo revizaun ba kurríkulu.

Enkontru ne’ebé Ego Lemos partisipa ba hanesan enkontru inisiál no informál de’it, maibé parte kompetente sei kontinua reuniaun iha nível ministeriál.

“Ita espera katak aban bainrua ita-nia oan sira ramata iha sekundária jerál tékniku vokasionál, pelumenus pursentu 50 (50 %) fila-fali dezenvolve sira-nia suku no aldeia liuhusi karpintária ka komérsiu,” nia fó hanoin.

Nia haktuir, maioria povu iha rurál moris iha área agrikultura, iha ne’ebé sai hanesan baze fundamentu ba dezenvolvimentu ekonomia. Tanba ne’e, presiza reforma iha tékniku vokasionál. Importante liu reforma kurríkulu para bele haan-malu ho konteúdu lokál.

Relatóriu hosi Banku Dezenvolvimentu Aziátiku (ABD-sigla inglés), katak joven balun hili tama universidade, balun hili kursu Korea no Inglés hodi prepara ba serivisu iha rai-li’ur.

Diretór Jerál Sekretaria Estadu Polítika Formasaun Profisionál no Empregu (SEPFOPE), Paulo Alves, fó-sai dadus katak traballadór na’in 2300 mak oras ne’e serbisu iha Korea no serbisu iha Austrália hamutuk 2819.

Entretantu, timoroan sira ne’ebé serbisu iha Reinu Unidu laiha dadus klaru, tanba barak liu liuhosi dalan privadu.

 Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here