Primeiru-Ministru, Taur Matan Ruak. Imajen/Antonio Goncalves

DILI, 09 maiu 2019 (TATOLI)-Parte ida hosi polítika governu da-ualu nian iha setór defeza no seguransa nian,  oinsá halo integrasaun servisu entre instituisaun FALINTIL-Forsa Defeza Timor-Leste (F-FDTL) ho Polisia Nasionál Timor-Leste (PNTL).

“Ha’u mós fó ona instrusaun ba Ministru Defeza atu haree polítika ida  sistema integradu atu formasaun iha terrenu ne’e polísia halo ninian no F-FDTL halo ninian, maibé halo ida de’it depois maka fahe”,  informa Primeiru-Ministru, Taur Matan Ruak, ba jornalista sira, ohin, iha Palásiu Prezidente Nicolau Lobato, Ai-Tarak Laran, Dili.

Primeiru-Ministru hateten, planu ne’e governu konsidera di’ak hodi hamenus gastu orsamentu ba rekrutamentu no formasaun inklui prevene duplikasaun planu programa hodi konsentra ba dezenvolvimentu nasionál  seluk ba hamenus ki’ak.

Governu mós sei kria planu hodi kria  akademia militár no Polísia ida de’it hodi implementa polítika integrasaun servisu entre instituisaun rua ne’e iha futuru.

“Ne’e kestaun tékniku liu ne’ebé ha’u nia orientasaun mak ne’e no ha’u espera katak Ministru Defeza bele haree atu lori ba konsellu ministru atu diskute”, tenik Primeiru-Ministru Taur Matan Ruak.

Polítika transferénsia pesoál F-FDTL  ba PNTL ne’e mós ideas mai hosi Ministru Defeza Filomeno Paixão ho Komandante F-FDTL, Majór Jenerál Lere Anan Timur no tuir estatutu Militár  fó kontratu ba soldadu F-FDTL ho durasaun tinan hitu de’it tanba ne’e governu prepara polítika atu halo transferénsia bainhira termina kontratu.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here