Sekretáriu Estadu Ambiente, Demétrio de Amaral de Carvalho. Imajen/Egas Cristovão

DILI, 8 maiu 2019 (TATOLI)-Sekretáriu Estadu Ambiente (SEA), Demétrio do Amaral de Carvalho, informa dekretu lei kona-ba eliminasaun, importasaun, no produsaun saku plástiku uzu úniku, embalajen no objetu husi plástiku ne’ebé ohin aprezenta hetan observasaun husi Konsellu Ministru no seidauk iha aprovasaun.

Maibé iha komentáriu balu ne’ebé karik membru Governu sira hakarak atu fornese tan ba dekretu lei ne’e, depois ita sei halo integrasaun hosi komentáriu sira hosi membru Governu, ministériu relevante sira depois ita sei re-aprezenta ba Konsellu Ministru hodi hetan aprovasaun”,  hateten Sekretáriu Estadu Demétrio do Amaral de Carvalho, ohin, hafoin reuniaun KM iha Palásiu Governu.

Diploma ida ne’e rasik atu prevene no hamenus impaktu hosi rezíduu iha ambiente, no haree kle’an liu, prinsipalmente produtu plástiku sira ne’ebé labele resiklavel no prevee ba bandu fa’an, importasaun no produsaun hosi determinadu objetu husi plástiku.

Diploma ne’e hakarak estabelese mós prinsípiu fundamentál sira maka hanesan prekausaun, prevensaun, dezenvolvimentu sustentavel, seguransa ambientál globál, poluidór-pagadór, re-utilizasaun no resiklajen no valorizasaun enerjétika.

Demétrio Amaral esplika, iha eliminasaun saku plástiku uzu úniku relasiona ho alternativu sira ne’ebé maka halo balu ona maka halo saku plástiku husi ai-farina ne’ebé empreza balu intervein ona, maibé alternativa seluk hakarak atu enkoraja operadór ki’ikoan sira bele prodús husi matéria orgánika hanesan kohe, bote, saku sira ne’ebé bele halo ho matéria orgánika.

Iha soru-mutu KM ne’e SEA aprezenta mós proposta kona-ba dekretu lei protesaun no konservasaun biodiversidade.

“Proposta lei ne’e iha Governu anteriór aprova tiha ona iha Konsellu Ministru iha marsu 2017, haruka tiha ba Prezidente Repúblika, halo observasaun katak iha inkonstitusionalidade ba artigu 62 husi dekretu lei ne’ebé propoin, kontradisaun ho Konstituisaun Repúblika artigu 144, maibé depois haruka ba Tribunál, konklui laiha inkonstitusionalidade. Pur tantu, hosi ida ne’e ita re-submete mai Konsellu Ministru atu aprova no envia fali ba Prezidente Repúblika hodi hetan promulgasaun”, hateten Demétrio  Amaral.

Jornalista   : Maria Auxiliadora

Editór         : Francisco Simões

 

 

HAKEREK NO HATÁN

Please enter your comment!
Please enter your name here