Primeiru-Ministru, Taur Matan Ruak, prezide reuniaun Konsellu Ministru iha Palásiu Governu. Imajen/Egas Cristóvão

DILI, 08 maiu 2019 (TATOLI) – Governu liuhusi Konsellu-Ministru (KM), iha kuarta-feira (08/05) ne’e, aprova ona Proposta Deliberasaun ne’ebé aprezenta husi Ministru Administrasaun Estatál em ezersísiu, Abílio José Caetano kona-ba prosesu aprovizionamentu ba implementasaun estratéjia investimentu ba jestaun rezídus sólidus iha kapitál Dili.

Ministru Estadu Prezidénsia Konsellu-Ministru, Hermenegildo Augusto Cabral Pereira informa katak Konsellu-Ministru aprova ona proposta deliberasaun ba projetu ida atu hahú prosesu implementasaun rezídus sólidus iha Dili.

“Konsellu-Ministru rona projetu ne’ebé atu hahú prosesu aprovizionamentu ba implementasaun estratéjia investimentu no jestaun rezídus sólidus iha Dili hanesan parte ida rekolla prosesu tratamentu fo’er iha Dili. Ministru Administrasaun Estatal em ezersísiu aprezenta no hetan aprovasaun, atu hahú Prosessu aprovizionamentu,” tenik Ministru Hermenegildo Pereira ba jornalista sira iha Palásiu Governu hafoin reuniaun Konsellu-Ministru.

Projetu ne’e, halo planu ba jestaun rezídus sólidus hodi propoin kona-ba modelu kontentór sira ne’ebé modernu no efisiente atu tau fo’er, karreta atu tula fo’er, ekipamentu movel no ekipamentu ateru nian atu hadi’a padraun operasionál husi fatin soe fo’er nian iha Tibar.

Objetivu seluk tan husi planu ne’e atu hadi’a servisu rekolla rezídus sólidus ne’ebé ba oin sei uza métodu rekolla mekánika.

Planu ne’e, buka mós atu transforma fatin fo’er iha Tibar ba aterru kontrolu ida, tuir estratéjia integrada kona-ba tratamentu ba fo’er sira.

Planu kona-ba implementasaun jestaun rezídius sólidus urbanu iha Dili, aprezenta katak benefísiu prinsipál husi planu ne’e mak hadi’a kualidade ambiente sidade, hadi’a saúde, hamenus risku inundasaun efisiénsia boot liután husi rekolla no jestaun rezídius nian, liuhusi prátika nível internasionál nian.

Nune’e mós kria oportunidade kona-ba empregu no posibilidade ba kreximentu turizmu nian liuhusi jestaun ne’ebé efikás no manutensaun ambiente nian.

Iha biban ne’e, Konsellu-Ministru mós aprova réjime jurídiku konservasaun biodiversidade ne’ebé aprezenta husi Sekretáriu Estadu Ambiente, Deométrio Amaral de Carvalho.

Enkuantu, proposta dekretu lei ba alienasaun importasaun no produsaun saku embalajen no objetu husi plástiku mak sei analiza hafoin mak aprezenta fila fali iha Konsellu-Ministru hodi hetan apresiasaun.

 Jornalista      : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here