Diretór Ezekutivu Esperansa Timor Oan (ETO) Nilton Gusmão, Tersa (7/5/2019), hasoru malu ho Ministru Justisa Manuel Cárceres da Costa, hodi finaliza dokumentu ba prosesu arrendamentu Rai Estado iha antigu Tiger Fuel, Dili. Imajen/Egas Cristovão

DILI, 7 maiu 2019 (TATOLI)-Kompañia Esperansa Timor Oan (ETO), ohin, finaliza ona dokumentu ba prosesu arrendamentu rai Estadu iha antigu estasaun kombustivel Tiger Fuel, Mandarin, Dili.

“Kontratu  arrendamentu ne’e sei tau hela  Australianu nu’udar proprietáriu ba Tiger Fuel nia naran. Agora ETO sosa tiha ona Tiger Fuel, maka entaun ETO mai muda fali kontratu ba Nilton Gusmão nia naran”, hateten Ministru Justisa, Manuel Cárceres da Costa, ba Ajénsia TATOLI iha edifísiu Ministériu Justisa, Caikoli, Dili, hafoin selebra finalizasaun dokumentu ba prosesu arrendamentu rai Estadu ba Nilton Gusmão, nu’udar proprietáriu ba kompañia ETO.

Kontratu arrendamentu sei tau fali ETO nia naran hodi troka Tiger Fuel hodi fó apoiu investimentu iha rai laran.

Iha biban hanesan, Nilton Gusmão, hateten, nia parte sei elabora di’ak liu tan investimentu estasaun kombustivel ne’e ho di’ak hodi bele fó espasu atendimentu ida di’ak liu ba komunidade.

“Molok atu investe ami mai husu ba governu atu fó kontratu  arrendamentu ho Estadu ho tempu naruk uitoan atu ami bele halo investe”, hateten Nilton Gusmão.

Prosesu reabilitasaun estasaun kombustivel Tiger Fuel ne’ebé oras ne’e nakfilak  ona ba ETO sei akontese iha tinan ne’e hafoin hetan e kontratu arrendamentu ho Estadu.

Periodu no valor arrendamentu ne’e seidauk iha desizaun, maibé na’in ba kompañia ETO ne’e komprometidu atu selu arrendamentu rai ba estadu hodi utiliza fatin area ne’e tuir proposta para atu lori servisu ida di’ak liu ba kliente sira iha merkadu.

Kompañia ETO sosa asaun  Tiger Fuel hosi sidadaun Australianu ho valor millaun US$2 no tuir planu sei investe tan millaun US$1,5 hodi hadi’a kondisaun infraestrutura.

ETO sei halo operasaun estasaun kombustivel durante oras 24 nia laran depois hadi’a kondisaun no absorve tan timoroan hodi fó oportunidade servisu ba Timoroan.

Daudaun ne’e kompañia ETO emprega ona ema hamutuk na’in 19 maka servisu iha estasaun kombustivel refere.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here