Ministru Justisa, Manuel Cárceres da Costa. Imajen/ Antonio Goncalves

DILI, 06 maiu 2019 (TATOLI)-Prosesu negosiasaun arrendamentu rai ba konstrusaun edifísiu Embaixada Estadu Unidus Amérika (EUA) nian iha Dili tama ona iha faze finalizasaun hodi hetan konkordánsia.

Ministru Justisa, Manuel Cárceres da Costa, informa, prosesu negosiasaun konsege hetan konkordánsia ida atu EUA selu arrendamentu rai tuir valór ne’ebé governu estabelese.

“Valór arrendamentu ne’e tuir ona fatin nia hela ne’ebá VIP  tanba ne’e valor ne’e labele hanesan fali  iha area Caicoli”, hateten Ministru Justisa, Manuel Cárceres da Costa, ohin, ba Jornalista Sira iha Palásiu Governu.

Kona-ba valór arrendamentu rasik, Ministru Cárceres garante ba media sira atu asesu bainhira asina akordu ne’e iha tempu besik.

Tuir kontratu arrendamentu rai ne’ebé governu da-uluk estabelese ho Estadu Unidus Amérika  iha Setembru  2002  fó aluga rai to’o 2032 no iha posibilidade extende to’o 2052. Maibé, Governu da-ualu nian konsidera, presiza atu halo revizaun ba kualkér kontratu arrendamentu tanba haree hosi presu rai iha merkadu oras ne’e.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here