DILI, 06 maiu 2019 (TATOLI) – Prokuradór Jerál Repúblika (PJR), José da Costa Ximenes, hateten Ministériu Públiku (MP) konklui ona akuzasaun ba kazu omisídiu ne’ebé akontese iha Bairru Kulu-hun Kraik ne’ebé akontese domingu loron 18 fulan Novembru 2018 liubá.
“Ha’u mai hasoru Prezidente Repúblika informa atividade Ministériu Públiku nian, biban ne’e ha’u mós informa kona ba kazu omisídiu ne’ebé akontese iha Bairru Kulu-hun, indikasaun involve membru PNTL na’in haat, Ministériu Públiku konklui ona, halo ona akuzasaun iha 30 abríl remete ona ba Tribunál Distritál Dili atu bele ajenda loron julgamentu”, hateten PJR ba jornalista sira hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál, Bairru Pité, ohin.
José da Costa Ximenes afirma suspeitu ba kazu refere hamutuk na’in haat, maibé husi haat ne’e iha na’in rua maka ninia prosesu arkiva.
“Husi na’in 4 ne’e na’in rua nia prosesu deside arkiva, na’in rua seluk maka akuza, tanba rezultadu ezame balístika konklui vítima sira ne’e mate kauza husi bala musan ne’ebé sai husi membru Polísia Nasionál Timor-Leste na’in rua ne’e nian ne’ebé daudauk iha prizaun preventiva”, esplika.
Bainhira konfirma kona ba ezame balístika halo iha ne’ebé, lideransa másimu ministériu públiku ne’e dehan la interese ezame balístika halo iha nasaun ne’ebé, maibé importante maka iha ona rezultadu.
Jornalista: Antónia Gusmão
Editora: Rita Almeida
http://www.tatoli.tl/2018/11/kazu-kuluhun-pr-oknum-polisia-tanba-atua-fora-de-regra/
http://www.tatoli.tl/2018/11/julio-hornay-medida-forte-ba-akontesementu-kuluhun-kraik/
http://www.tatoli.tl/2018/11/governu-hatoo-sentidu-kondolensias-familia-matebian-iha-kuluhun/
http://www.tatoli.tl/2018/11/pn-apresia-familia-vitima-kuluhun-koopera-ho-estadu/
http://www.tatoli.tl/2019/03/mrkf-realiza-dialogu-no-reflesaun-kona-ba-trajedia-kuluhun/
