Ministru Justisa, Manuel Cárceres da Costa. Imajen/Antonio Goncalves

DILI, 06 maiu 2019 (TATOLI) –Ministériu Justisa (MJ) sei halo reestruturasaun ba funsionáriu sira iha MJ maske nune’e sei la muda kargu diretór no xefe departamentu sira tanba konsidera iha esperiénsia ona.

“Diretór ne’e diretór nafatin, Xefe Departamentu nafatin, tanba sira iha esperiénsia serbisu ona, maibé muda de’it fatin. Se uluk nia iha fatin ida, nia muda fali ba fatin seluk, para depois iha refreshing uitoan,” informa Ministru Justisa, Manuel Cárceres ba jornalista sira hafoin hasoru malu ho Primeiru-Ministru, Taur Matan Ruak iha Pálasiu Governu, segunda (06/05).

Bainhira hasoru malu ho xefe governu, Ministru Justisa, Manuel Cárceres hato’o relatóriu trimestrál ministériu nian no iha momentu hanesan ministru ko’alia uitoan kona-ba Lei Orgánika.

“Lakle’ur tan Lei Orgánika Ministériu Justisa kuandu Prezidente Repúblika promulga karik, sei iha reestruturasaun ba iha Ministériu Justisa (MJ), maibé ha’u informa ba Primeiru-Ministru katak ha’u sei la troka ha’u nia diretór sira”, tenik ministru justisa perante jornalista sira.

Governante ne’e mós haktuir, bainhira iha serimónia isar bandeira ohin dader, nia informa ona ba funsionáriu MJ nian katak bainhira simu despaxu ministériu nian para haruka ba servisu iha munisípiu karik, tenke kumpre orden atu ba servisu iha munisípiu.

“Labele hatuk hotu iha Dili. Dili ne’e ema barak demais dalaruma ita la koñese malu, ne’ebé balun tenke ba servisu iha munisípiu ne’ebá”, dehan Ministru.

Jornalista: Julia Chatarina

Editór      : Rafy Belo

HAKEREK NO HATÁN

Please enter your comment!
Please enter your name here