Ministra Finansa RI, Sri Mulyani Indrawa, prezidente ADB, Takehiko Nakao, Ministra Finansa Timor-Leste ein funsaun, Sara Lobo Brites, Sábadu (4/5/2019, iha Fiji, asina memorandu entendimentu (MoU-sigla inglés) kona-ba komérsiu fronteirisu. Imajen/Espesiál

DÍLI, 05 maiu 2019 (TATOLI)-Governu Timor-Leste (TL), Repúblika Indonézia (RI) ho Banku Dezenvolvimentu Aziátiku (ADB-sigla inglés), asina ona memorandu entendimentu (MoU-sigla inglés) kona-ba komérsiu fronteirisu no kooperasaun entre Timor-Leste no Timór Osidentál (NTT-sigla indonézia), provínsia ida iha Indonézia.

MoU ne’ebé asina iha Fiji, Sábadu (4/5/2019), entre  prezidente ADB, Takehiko Nakao, Ministra Finansa Timor-Leste ein funsaun, Sara Lobo Brites, ho mós Ministra Finansa RI, Sri Mulyani Indrawati, nu’udar parte ida hosi enkontru annual ADB nian ba tinan 2019.

Liuhosi MoU ne’e, Indonézia ho Timor-Leste sei foti asaun atu redús barreira fronteira rai no transportasaun aéreu no armoniza prosedimentu iha pontu pasajen fronteira nian. Nune’e mós buka hodi hamenus obstákulu saúde animál ba komérsiu pekuáriu no hasa’e produsaun turizmu iha NTT no Timor-Leste liuhosi merkadu konjuntu (joint market) no itineráriu.

Komunikadu ne’ebé  Ajénsia TATOLI asesu, ohin, informa katak ADB fornese millaun US$1 atu suporta implementasaun hosi akordu ne’e. ho nune’e, Prezidente ADB, Takehiko Nakao, espresa dehan, kooperasaun no integrasaun rejionál mak fundamentál ba kreximentu sustentavel no inkluzivu iha Ázia no Pasífiku.

“MoU ne’e nu’udar pasu ki’ik, maibé importante iha ami-nia apoiu ba kooperasaun fronteirisu entre Indonézia no Timor-Leste. Suporta meiu sustentavel iha área fronteirisu ne’ebé atrazadu mak fundamentál para kombate dezigualdade no garante prosperidade iha ita-nia rejiaun atu ema hotu bele sente”, hateten Takehiko Nakao.

Ministra Finansa ein funsaun, Sara Lobo Brites, esplika, Timor-Leste halo ona pasu signifikativu dezde independénsia, mas ne’e sei kontinua. Timor-Leste tenke integra besik liu ASEAN no ekonomia mundiál no mós halo diversifikasaun ekonomia.

“Hamenus barreira ba komérsiu no serbisu hamutuk ho ami-nia viziñu mak pasu importante atu alkansa objetivu ne’e. Ami, benvindu ba MoU ho ADB no Indonézia hanesan inísiu husi parseria ne’ebé kontinua no benefísiu mútua ba kreximentu”, hateten Ministra Sara Lobo Brites.

Ministra Finansa Indonézia, Sry Mulyani Indrawati, dehan, Timór Osidentál nu’udar fronteira ida Indonézia nian ne’ebé iha poténsia ekonómika atu dezenvolve liután liuhusi kooperasaun ho Timor-Leste. Ne’e hala’o liuhosi konetividade, asesibilidade, no kapasidade no mós kolaborasaun ekonomia fronteirisa.

Sri Mulyani hato’o katak akordu ne’e hanesan komplementa sira-nia estratéjia nasionál. Nota entendimentu ne’e nu’udar pasu kontinuidade iha relasaun ho ADB ba suporta área fronteirisa, no kolaborasaun adisionál ho amigu no kolega iha Timor-Leste.

Notísia relevante: http://www.tatoli.tl/2019/04/tl-indonezia-no-adb-sei-asina-akordu-komersiu-fronteirisu/

Jornalista :Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here