Husi karuk ba liman los, MRLAP,Fidelis Magalhaes, Embaxadora EUA, no Representante MCC, Caroline T. Nguyen, Manajer Dir ba Eropa, Asia Fasifik no Amerika Latin kualia ba jornalista sira hafoin asina akordu simu apoiu husi MCC iha Salaun PCM, Kinta 3 Maiu 2019.Imajen Antonio Goncalves

DILI, 03 maiu 2019 (TATOLI) – Governu Timor-Leste liuhosi Ministru Reforma Lejizlativa no Asuntu Parlamentár (MRLAP), Fidelis Leite Magalhães asina ona akordu implementasaun Millennium Challenge Cooperation  (MCC) ho Diretora Jerál  MCC, Caroline T. Nguyen husi Estadu Unidu Amérika (EUA) hodi avansa servisu tékniku ho apoiu husi MCC ho montante millaun $7,380.

Ministru Reforma Lejizlativa no Asuntu Parlamentár, Fidelis Leite Magalhães, ne’ebé antes ne’e hetan ona kompeténsia husi Konsellu-ministru dehan katak akordu ne’e hodi fasilita MCC no Governu Timor-Leste ho Compact Development Team hodi halo preparasaun ne’ebé di’ak liu ba produtu finál kompaktu.

“Produtu ida ne’e mak sei estipula intervensaun saida mak Timor-Leste hakarak avansa ho programa ne’ebé MCC konkorda”, hateten Ministru Reforma Lejizlativa no Asuntu Parlamentár, Fidelis Leite Magalhães, iha ámbitu serimónia asinatura ne’e, iha Palásiu Governu, sesta (03/05).

Iha Novembru 2018, Konsellu-ministru deside no aprova ona área ne’ebé atu dezenvolve mak hanesan bee no saneamentu, dezenvolvimentu umanu no instituisaun sira ne’ebé atu fasilita negósiu. Maibé, agora daudauk sei fó prioridade liu ba área rua dahuluk.

Tuir governante ne’e, buat ne’ebé mak MCC apoiu la hanesan ho apoiu seluk. Ita nu’udar membru mak sai hanesan na’in ho rekizitu programátiku no prosedurál tenke hahú identifika no buka hadi’a problema sira.

“Iha mós retornu ba investimentu, ida ne’e halo parte no kompromisu ita nian atu halo loloos, tanba nia sei fó rekizitu barak ne’ebé sei kontribui atu hadi’a didi’ak mekanizmu jestaun rasik ba servisu sira”, dehan tan Ministru Reforma Lejizlativa no Asuntu Parlamentár ne’e.

Enkuantu, Diretora Caroline T. Nguyen iha nia intervensaun hateten, objetivu husi programa MCC la’ós de’it nasaun membru sai na’in ba programa ne’e maibé mós sei reforsa área ne’ebé hili ona hodi sai prioridade sustentável.

“Ohin asinatura ba grant (konsensaun) ho montante milliaun $7,350 hatudu komprimísiu MCC no Governu Timor-Leste atu dezenvolve programa atu hasa’e kreximentu ekonómiku no reduz ki’ak iha Timor-Leste. Ami-nia ekipa sei utiliza orsamentu ne’e hodi halo análiza impaktu bainhira implementa programa,” afirma diretora MCC ne’e.

Iha fatin hanesan, Embaixadora EUA iha Timor-Leste, Kathleen M. Fitzpatrick   reforsa katak akordu ne’e atu avansa serbisu tékniku importante ne’ebé nesesáriu ba dezenvolvimentu kompaktu husi timoroan ba timoroan.

“Ha’u hakarak kongratula Governu Timor-Leste no embaixadór Constâncio Pinto no ekipa dezenvolvimentu kompaktu ba sira-nia kompromisu hodi dezenvolve programa ida ne’ebé haburas ekonomia no kria empregu,” dehan diplomata ne’e.

Diretór Ezekutivu Nasionál Compact Development Team Timor-Leste, Constâncio Pinto akresenta, apoiu grant ne’e atu dezenvolve programa kompaktu ne’ebé sustentável no hanesan preparasaun téknika.

“Serimónia ne’e hatudu commitment (kompromisu) EUA atu sai parseiru di’ak ba Timor-Leste, liu-liu dezenvolve programa kompaktu hanesan problema reduz ki’ak”, katak.

Antes ne’e, Governu Timor-Leste kontribui ona orsamentu ho valór $650.00 hodi hahú prosesu preparatória.

Lee mós notísia: http://www.tatoli.tl/2018/07/mcc-sei-oferese-rihun-750-ba-tl-reduz-kiak/

Jornalista       : Julia Chatarina

Editór              : Rafy Belo

HAKEREK NO HATÁN

Please enter your comment!
Please enter your name here