Ministru Obra Públika, Salvador Soares dos Reis Pires. Imajen António Gonçalves

DILI, 03 maiu 2019 (TATOLI) – VIII Governu Konstitusionál liuhusi Diresaun Nasionál Planeamentu Urbanu no Abitasaun (DNPUA), kria ona planu iha tempu besik sei harii uluk uma hamutuk rihun haat (4.000) liu hodi prepara ba komunidade atu hela.

Ministru Obra Públika (MOP), Salvador Eugénio Soares dos Reis Pires, informa Dili sai hanesan kapitál nasaun Timor-Leste, presiza regula futuru abitasaun komunitária ho organizadu hodi nune’e planu urbanu ba kapitál Dili bele implementa ho susesu tuir tarjetu governu nian.

“Saida maka governu bele halo iha kurtu prazu mak ami hanoin atu estabelese uma 4.000 (rihun haat) unidade ne’ebé ita sei halo iha Dili laran,” informa Salvador hodi responde ba preokupasaun Prezidente Repúblika, Francisco Guterres Lú  Olo, kona-ba planu urbanu ba sidade Dili nian, iha Palasiu Governu Dili, sesta ohin.

Nia esplika katak MOP liuhusi DNPUA rasik prepara tiha ona lei tolu hanesan Planu Urbanu Indentifikasaun, Klasifikasaun Revitalizasaun solo (rai) no Lei Planeamentu Teritoriál.  Lei tolu halo ho ninia natureza rasik para fasilita governu regula planu urbanu iha Dili no munisipiu hotu.

Fatin ne’ebé governu indentifika atu halo uma mak iha área Comoro no Becora inklui fatin balun tan.

Hafoin hari tiha uma, governu sei muda komunidade sira ne’ebé hela bairu la organizadu ba bairu foun. Nune’e prosesu harii uma iha bairu foun sei kontinua halo’a to’o ema hotu moris ho dignu.

Ministru Salvador rekoñese kapitál Dili agora povu sira moris dezorganizadu hanesan, halo uma iha mota ninin ne’ebé risku ba dezastre inklui hela iha foho leten no okupa no hela iha rai estadu.

Governu mós halo ona identifikasaun iha kapitál Dili, fatin sira ne’ebé sei hasai komunidade maka área Aitarak-Laran, Tasi Tolu, mota Comoro ninin no fatin seluk tan.

“Fatin sira ne’ebé risku mak Aitarak-Laran, okupasaun ilegál halo uma besik mota (Comoro), iha foho, tasi ibun, tanba loloos área sira ne’e sujeitu ba dezastre naturál no komunidade tuir loloos labele ba hela iha fatin risku sira ne’e,” nia hatete.

Iha Dili, nia haktuir, bainhira ema hela no halo uma dezorganizadu halo governu susar atu halo instalasaun dada bee-moos, hadi’a infraestrutura estrada, drenajen, esgotu no seluk tan.

Kona-ba orsamentu atu implementa planu urbanu ne’e, Ministru Salvador dehan Primeiru Ministru Taur Matan Ruak sei husu MOP atu aprezenta iha reuniaun Konsellu Ministru hodi deskute ninia mekanizmu implementasaun.

Ministru hatutan, mezmu govenu prepara ona lei tolu ba planu urbanu ne’e la’ós atu implementa agora, maibé governu sei sosializa uluk ba komunidade hodi intende didi’ak planu urbanu.

 “Ita halo lei ne’e la’ós atu ba implementa ona, maibé ninia karaterístiku ne’e hanesan atu kontrola jestaun de’it kona-ba jestaun konstrusaun infraestrutura fíziku iha ita nia área urbana,” nia hatete.

Nia hatutan, iha fulan kotuk, ekipa tékniku MOP no Ministériu Justisa (MJ) liuhosi Reprezentante Terras Propriedade nian hamutuk ho autoridade lokál suku Kumoro hodi identifika terrenu ba futuru abitasaun komunitária.

Programa planu urbanu no abitasaun ne’e polítika ida hosi MOP nian hodi halo revitalizasaun no abitasaun ba bairru sira tuir mandatu Governu Konstitusionál daualu  (VIII) nian Governu tenke revitaliza bairru ida hodi sai ezemplu ba iha futuru.

Entretantu iha parte seluk, Ministru Salvador hateten, MOP halo ona liña koordenasaun ho Ministeriu Justisa, Ministru Administrasaun Estatal (MAE), Prezidente Autoridade Dili, no Komandu Munisipiu Dili iha tempu besik sei muda komunidade sira ne’ebé hela besik estrada ninin hosi área Rotunda Prezidente Nicolau Lobato Comoro too área Tibar-Likisa.

“Ekipa identifika ona iha tempu besik sei dezloka komunidade ba fatin seluk, agora governu sei fó kompensasaun tuir akordu ho komunidade ne’ebé ita identifika se la sala kuaze família uma kain 500 liu,” nia hatete.

Governu husu atu komunidade hamamuk estrada ibun, atu nune’e bele haluan tan estrada hosi rotunda Comoro to’o Tasi-Tolu. Tanba, tuir planu, iha fulan-jullu 2021 estrada liga hosi Portu Tibar mai to’o Rotunda, Comoro finaliza ona hodi fasilita movimentasaun transporte públiku no privadu inklui transporte pezadu ne’ebé sei halo movimentasaun Portu Tibar-Dili.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here