Prezidente Repúblika, Francisco Guterres Lú Olo. Imajen Mídia PR

DILI, 30 abr 2019 (TATOLI) – Prezidente Repúblika, Francisco Guterres Lú Olo, husu Estadu Timor-Leste atu tau matan ba traballadór timoroan sira nia serbisu, tanba traballadór sira prodús rikeza nasionál liuhosi knaar oi-oin.

“Ha’u apela ba setór públiku no privadu sira atu hametin relasaun ho traballadór sira, hodi garante traballadór sira-nia direitu no kondisaun empregu di’ak tuir lei haruka”, Xefe Estadu ba jornalista sira liuhusi konferénsia ba imprensa iha Palásiu Prezidente Nicolau Lobato, tersa (30/4/2019), relasiona ho loron mundiál ba traballadór sira ne’ebé monu iha loron 1 maiu 2019.

Lú Olo haktuir konstituisaun Timor-Leste valoriza serbisu ne’ebé de’it maka timoroan sira halo no ho serbisu maka bele valoriza aan, nu’udar ema ho kapasidade no talentu atu prodús rikusoin ba aan rasik.

Nia realsa ohin loron taxa dezempregu iha Timor-Leste aas tebe-tebes, tan ne’e joven barak mak buka serbisu iha rai seluk atu moris dignu no fó mós moris-di’ak ba sira-nia família iha rai laran.

Lú Olo hatutan biar sira (timoroan) haruka osan mai no sai ona segunda fonte rendimentu ba Timor-Leste, maibé buka empregu iha rai li’ur la’ós solusaun ba problema dezempregu iha Timor-Leste.

“Ha’u apela ba Governu Timor-Leste atu buka lalais dalan atu diversifika setór produtivu, nune’e hasa’e postu traballu iha rai laran. Hahalok ida ne’e urjente tebe-tebes atu ita bele manán lalais luta hasoru kiak”, nia tenik.

Nia salienta Timor-Leste presiza investe liu-liu iha formasaun vokasionál para bele garante setór produtivu ida ho kualidade aas no iha kapasidade atu kompete iha merkadu nasionál no internasionál.

“Maioria populasaun moris ho rendimentu hosi rai. Nune’e, Governu presiza investe maka’as iha agrikultura, pekuária no turizmu. Setór sira ne’e sei hamosu empregu barak iha tempu badak. Ho rendimentu, mak sidadaun ida-idak bele halo ninia uma kain rasik”, afirma Lú Olo.

Loron 1 maiu mosu nu’udar data istórika ida ba traballadór sira, iha Chicago, Amérika. Iha tinan atus ida tolu nulu resin tolu liu-bá, traballadór sira halo manifestasaun dahuluk hodi ezije kondisaun serbisu di’ak liu, inklui hatún tempu serbisu hosi oras 13 ba oras ualu, loron ida.

Liu tiha tinan tolu, iha Paris, Fransa, organizasaun internasionál hanaran Internasionál Sosialista, deside foti loron 1 maiu nu’udar loron ba traballadór sira-nian.

Tanba ne’e, tinan-tinan, hahú hosi 2005, Timor-Leste asosia ofisiálmente ho rai sira seluk, iha loron 1 maiu, atu fó-hanoin no valoriza traballadór hotu-hotu iha mundu tomak.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here