Prezidente Repúblika, Francisco Guterres Lú Olo, entrega lembransa ba Embaixadora Repúblika Nova Zelandia mai Timor-Leste, Vicki Poole, ne’ebé ramata ona ninia mandatu hanesan embaixadora iha Timor-Leste.Imajen Media PR

DILI, 30 abr 2019 (TATOLI)—Reprezentante Estadu Repúblika Nova Zelándia iha Timor-Leste apresia tebes ho Timor-Leste nia kompromisu ba demokrasia no direitu umanu.

Apresiasaun ne’e hato’o hosi Embaixadóra Repúblika Nova Zelándia  mai Timor-Leste , Vicki Poole ba jornalista sira hafoin hasoru malu ho Prezidente Repúblika, Francisco Guterres Lú Olo, ohin, iha Palásiu Prezidente Nicolau Lobato, Bairru Pité, Dili.

Embaixadóra Vicki Poole espera katak, Timor-Leste sei sai membru ASEAN iha futuru no halo investimentu ba nia foin sa’e sira, liuhosi edukasaun no kompromisu ba   diversifikasaun ekonomia.

Embaixadóra Repúblika Nova Zelándia mai  Timor-Leste, Vicki Poole, hasoru malu ho Prezidente Repúblika, Francisco Guterres Lú Olo, hodi informa mós kooperasaun ne’ebé hala’o durante tinan tolu iha entre parte rua, intermus halo iha nivel internasionál ho parseria iha direitu umanu no multilaterál.

Iha nivel bilaterál, Governu Nova Zelándia fó nia apoiu ba dezenvolvimentu iha produsaun kafé, edukasaun ba labarik, turizmu, polísia komunitária no defeza..

Embaixadóra Vicki Poole iha konfiansa metin ba lideransa nasionál ne’ebé iha vizaun luan no naruk ba nasaun. Iha biban ne’e, Prezidente Repúblika hateten kooperasaun Timor-Leste ho Nova Zelándia forte tebes, hatudu kedas husi partisipasaun Forsa Nova Zelándia nian iha International Force for East Timor (INTERFET) iha 1999 ba manutensaun pás no kontinua apoiu seguransa nasaun nian to’o iha 2012.

Tuir Prezidente Repúblika, kooperasaun Timor-Leste ho Nova Zelándia sei sai buras liu-tan iha futuru.

Embaixadóra  Vicki Poole hasoru malu ho Xefe Estadu Timor-Leste nu’udar hasoru malu dala ikus nian tanba ninia mandatu ramata ona hafoin hala’o kna’ar durante tinan tolu iha Timor-Leste.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here