Espoza Prezidente Repúblika, Cidália Nobre Guterres (imajen kaer pasiente nia liman), akompañada hosi Vise Ministra Saúde, Elia Amaral (hatais faru kinur kahe tais), vizita pasiente sira iha Internamentu Saúde, Biloi, Munisípiu Viqueque, Sesta (26/4/2019). Imajen/Xisto Freitas

VIQUEQUE,(TATOLI)—Moras oin tolu (3), kompostu husi moras infesaun vias respiratória (ISPA-sigla indonézia), diarea simples ho moras kulit, daudaun ne’e, rejistu ás iha Internamentu Saúde, Sentru Saúde, Postu Saúde iha Munisipiu Viqueque.

Diretór Saúde Munisípiu Viqueque, Francisco de Carvalho, hateten, kauza hosi moras hirak ne’e mai hosi rai rahun no udan, maibé sira sempre halo atendimentu ho di’ak tanba ai-moruk sufisiente.

“Prosesu atendimentu tuir prosesu ne’ebé iha katak ami lori sira (pasiente) mai iha sentru saúde para doutór sira halo ezaminasaun ba sira nia saúde no halo mós promosaun ba sira para bele prevene sira nia an hosi moras”, hateten Francisco  de Carvalho, ba jornalista sira iha Internamentu Saúde, Biloi, Viqueque Vila, Munisípiu Viqueque, Sesta (26/4/2019).

Mezmu ladún iha difikuldade boot atu servi komunidade sira,  maibé tuir Francisco de Carvalho katak, pesoál saúde sira sempre enfrenta problema distánsia, katak bainhira haree ba área jeográfika, Viqueque ho medida ne’ebé luan no kondisaun estrada mós fó impaktu boot ba movimentu ambulánsia  sira atu lori pasiente sira mai iha ospitál.

“Ida ne’e difikulta ami liu-liu iha tempu udan. Ita-nia komunidade hela iha foho leten, tanba ne’e bainhira moras ami hetan difikuldade boot maka estrada. Ami kombina ho komunidade atu hulan pasiente to’o iha estrada, depois maka tula ho ambulánsia”, Francisco de Carvalho hateten.

Francisco de Carvalho informa,  pesoál saúde hamutuk ema na’in 400 itál maka halo atendimentu ba moras iha sentru saúde hamutuk 5, postu saúde hamutuk 43 no maternidade tolu ne’ebé maka lokaliza iha Munisípiu Viqueque.

 Iha fatin hanesan, Vise Ministra Saúde, Elia Amaral, hateten, antes udan monu rai, Ministériu Saúde hahú halo promosaun, oinsá atu komunidade hamoos uma ninian sira no troka mós bee iha hariis fatin atu prevene moras dengue no diarea.

Nia hatuan, karik iha futuru maka aldeia ida ka suku ida iha pasiente balun enfrenta moras dengue, sira sei halo omiliasaun no mós abatizasaun atu halo redusaun ba moras refere.

Elia afirma, iha orsamentu 2019, tau mós planu atu hola ambulánsia multi funsaun no agora tama ona iha prosesu aprovizionamentu, tan ne’e, tempu badak bele oferese balun ba iha ospitál ne’ebé presiza inklui Viqueque.

Espoza Prezidente Repúblika, Cidália Nobre Guterres, ne’ebé hamutuk ho Vise Ministra Saúde, Elia Amaral, halo vizita kortezia ba Internamentu Saúde Viqueque hateten, sente kontente tanba doutór sira halo atendimentu di’ak ba pasiente sira, tan ne’e, pasiente balun hetan ona ba mudansa ba moras.

“Ita sempre fó fiar ba ministériu sira liu-liu ministru ho nia vise ministra saúde atu halo di’ak liu-tan sira nia servisu, liu-liu atu akompaña nafatin no tau matan ba prioridade ne’ebé povu presiza liga ba realidade ne’ebé maka ita hasoru. Ita hein katak servisu ne’ebé maka sira halo ne’e bele responde ba nesesidade povu”, hateten  Cidália e Nobre Guterres.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here