logotipu PDHJ

DILI,(TATOLI)– Provedoria Direitus Umanus no Justisa (PDHJ-sigla Portugés)  sai uma na’in ba enkontru  sub-rejionál Sudeste Aziátiku direitus umanus nian.

Provedora Direitus Humanus no Justisa, Jesuina Maria Ferreira Gomes. Imajen/Portal Ofisiál PDHJ

Forum ne’ebé sei hala’o durante loron rua iha Dili, hahú hosi loron 24 to’o loron 25 Abril, tinan ne’e, iha Ótel JL. Vila, Fatuhada, ho objetivu atu hametin liután ekipa servisu tékniku Sudeste Aziátiku hanesan órgaun independente no organizasaun profisionál hodi promove estabilidade no hametin NHRIS iha rejiaun Aziátiku tuir akordu prinsípiu Paris nian, mobiliza rede servisu ho instituisaun akadémiku, instituisaun non-governamentál no organizasaun sosiedade sivíl, governante aziátiku no organizasaun direitus umanus internasionál. Nune’e maka iha 2019, TL sai hanesan uma na’in ba forum rede sub-rejionál direitus umanus hodi organiza enkontru ne’e iha Abril no sei akontese tan iha Jullu, enkuantu enkontru anuál sei akontese iha Outubru.

Provedora Direitus Umanus no Justisa, Jesuinha Maria Ferreira Gomes iha nia entrevista, hateten, PDHJ realiza ba dahuluk ekipa servisu tékniku iha Timor-Leste sub-rejionál Sudeste Aziátiku ne’ebé mai hosi instituisaun direitus umanus nian.

Ekipa servisu tékniku South East Asia NHRIS (Human Rights Institution) hanesan sub-rejionál iha Sudeste Aziátiku nu’udar mekanizmu forum no rede ida ne’ebé kompostu hosi instituisaun nasionál direitus umanus nian hosi nasaun neen maka hanesan Indonézia, Malaysia, Filipina, Myanmar, Tailándia inklui Timor-Leste.

Provedora  Jesuinha Maria Ferreira Gomes reforsa katak, enkontru ne’e importante atu servisu hamutuk hodi halo promosaun no protesaun ba direitus umanus, identifika issue jerál iha nasaun hotu hanesan tráfiku umanu, korrupsaun, direitu ekonomia sosiál no kultura, promove feto, ema ho defisiénsia no LGBT.

TL aprezenta iha forum ne’e maka ema ho defisiénsia, tanba tuir Jesuinha katak daudaun ne’e PDHJ halo hela advokasia ba asuntu ne’e, atu oinsá governu ho parlamentu bele ratifika konvensaun internasionál ba ema ho defisiénsia. Nune’e hosi nasaun balun iha sub-rejiaun ne’e sei aprezenta mós kona-ba objetivu dezenvolvimentu sustentável, ko’alia kona-ba imigrasaun no oinsá dezenvolve ekonomia iha Azean.

Jornalista: Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here