Diretór DNTT, Natalino de Rosario. Imajen Egas Cristovão.

DILI, (TATOLI) – Motorista rihun rua resin iha munisípiu Kovalima, ohin tuir teste atu hetan karta kondusaun  ba transporte motor no karreta  ne’ebé fornese hosi Diresaun Nasionál Transporte Terrestre (DNTT), Ministériu Transporte no Komunikasaun (MTK).

Diretór DNTT, Natalino de Rosario, hatete ekipa nasionál   ohin ofisiálmente fó ezame eskrita no prátika ba motorista sira durante semana rua iha munisípiu ne’eba hodi hetan karta kondusaun.

“Ohin ami nia ekipa ezaminadór ba, agora daudaun iha Suai hodi fó ezame ba kandidatu sira karta kondusaun ne’ebé rejistu ona pur-volta ema  rihun rua resin durante semana ida ne’e no ida mai ne’e”, dehan nia ba TATOLI iha  ninia kna’ar fatin Balide, ohin.

Motorista sira iha  obrigatóriu tuir ezame eskrita ho matéria kona-ba lei kódigu estrada, sinais tránzitu no ezame prátika maka tenke tama roda.

Diresaun ne’e prepara karta kondusaun ba motorista sira ba transporte motor fahe ba A1 uza hodi kondús motor ho CC ki’ik no A2 ba motor ho CC 150 ba leten.

Ba karreta ki’ik roda haat kategoria B1 automátiku no manuál, karta kondusaun B1 automátiku proibe lori karreta b1 manuál. Enkuantu, karreta kamioneta  C1 no Bus c2.

Nia dehan tan motorista ho karta kondusaun A1 ba motor proibe atu kondús motor boot tanba tama iha kategoria A2.

“Kondutór sira ne’ebé lori taxi, mikrolete angguna ne’e labele hetan B1 maibé B2, tanba tula pasajeiru iha ezame pergunta ne’ebé fó ba B1 no B2 la hanesan”, tenik tan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here