Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, (TATOLI) –Ministériu Agrikultura no Peska (MAP) iha ona definisaun polítika atu hahú halo sensu agríkola dahuluk iha Timor-Leste (TL) iha fulan Juñu, tinan ne’e.

Atu iha rekursu natoon ba alvu polítika sensu agríkola ne’e, maka Ministériu Agrikultura no Peska (MAP) ne’ebé lidera husi Ministru Joaquim José Gusmão, halo ona rekrutamentu pesoál ne’ebé atu servisu iha area refere.

 “Agora daudauk sensu agríkola komesa ona rekruta enumeradór no prosesu sei hotu iha fulan Maiu nia laran no sei komesa sensu agríkola iha fulan Juñu nia laran, tinan ne’e”, informa Ministru Joaquim José Gusmão, Segunda (22/4/2019), iha Palásiu Governu.

Ministru ne’e garante katak, ho sensu agríkola sei hetan dadus ne’ebé mak kredivel no kompletu, kona-ba atividade agrikultura iha territóriu tomak, hodi sai baze halo planu ba oin.

“Sensu agríkola sei hetan dadus loloos kona-ba atividade agrikultura hotu iha territóriu tomak, hanesan dadus se mak sai agrikultór, atividade saida mak agrikultór sira halo, rai hira mak uza kuda natar, batar, kafé no seluk tan”,  esplika Joaquim Gusmão.

Nia hatutan tan,  bainhira sensu ne’e hotu,  dadus ne’ebé  hetan sei sai baze hodi bele halo planu agrikultura ne’e ho di’ak no hatene potensialidade saida mak munisípiu ida iha. Ho nune’e, fasilita Governu, liuliu ministériu relevante nia intervensaun ba programa agrikultura ba loos ho ninia alvu.

Sensu agríkola nu’udar sensu dahuluk hafoin Timor-Leste (TL) hetan nia Restaurasaun iha 20 de Maiu 2002, ho nia objetivu prinsipál husi atividade ne’e atu bele hasa’e produsaun ho kualidade no hamenus kiak.

Antes ne’e, TL sidauk halo sensu ida loloos atu hatene potensialidade tanba ne’e liuhosi sensu agríkola ne’e bele hatene loloos kona-ba nia potensialidade ne’ebé maka Timor iha, hanesan rai ne’ebé produtivu no la produtivu, ema hela iha ne’ebé, mota boot iha ne’ebé, ai-laran, foho tutun no buat sira seluk atu iha dadus ne’ebé loloos.

Governu liuhosi Konsellu Ministru aprova ona Rezolusaun nú.23/2017 17 Maiu kona-ba determina realizasaun sensu agríkola no kria estrutura administrativa.

Diretór Jerál Estatístika no Prezidente Ezekutivu Sensu Agríkola, Elias dos Santos Ferreira, antes ne’e, informa planu rekrutamentu pesoál ba sensu agríkola 2019 hamutuk 4.700, ne’ebé kompostu husi entrevistadór 2.350, supervizór 1.175 no ema ne’ebé kaer GPS hamutuk 1.175.

Sensu agríkola sei realiza husi MAP ho tulun husi Diresaun Jerál Estatístika no peritu internasionál husi Organizasaun Nasoins Unidas kona-ba Ai-han nian (FAO-sigla ingles). 

Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here