Diretór DNTT, Natalino de Rosario. Imajen Egas Cristovão.

DILI,(TATOLI)-Daudaun ne’e Diresaun Nasionál Transporte Terrestre (DNTT-sigla portugés) halo esforsu hela hodi solusiona tratamentu   karta libreti (STNK-sigla Indonézia) orijinál ho xapa matrikula orijinál, inklui karta kondisaun orijinál ba kliente hotu iha territóriu.

Diretór Nasional Transporte Terrestre (DNTT-sigla portugés),  Natalino de Rosario, informa katak, Diresaun Nasionál Servisu Aprovizionamentu (DNSA) Ministériu Transporte no Komunikasaun, loke ona konkursu públiku (tenderizasaun) no oras ne’e tama ona iha prosesu sosa ekipamentu hirak ne’e.

“Informasaun ne’ebé ami hetan hosi DNSA Ministériu Transporte no Komunikasaun nian, katak kompras blanku libreti ka STNK ho total rihun rua nulu resin no kompañia ne’ebe manan tender ne’e iha ona no iha semana ida nia laran kompañia sei fornese blanku mai DNTT”, hateten Natalino de Rosario, hodi responde Ajénsia TATOLI iha nia servisu fatin, Balide, Dili, Tersa (23/4/2019).

Dezde kedas iha tinan 2017 to’o 2018, DNTT enfrenta problema la iha balnku prodús karta libreti ho karta kondisaun orijinál  tanba laiha orsamentu sufisiente atu sosa relasiona ho impase polítika no orsamentu dua désimu prevee de’it ba nesesidade bens servisu no saláriu ba ajenti estadu ho funsionáriu públiku.

Tuir planu, Natalino de Rosario hatutan, iha tinan ne’e, DNTT sei sosa blanku libreti to’o rihun haat nulu resin, maibé problema osan maka redús ba rihun rua nulu resin.

“Xapa matríkula tuir loloos ami sosa 32 mill i tall, maibé orsamentu lato’o, tanba ne’e, ami sei sosa de’it rihun rua nulu resin rua, motor mak barak liu kuaze rihun 20 no karreta besik rihun tolu, blanku ba karta kondusaun ba tinan ne’e ami hakarak sosa rihun 50, maibé sosa de’it rihun 20 resin nune’e mós blanku libreti tuir loloos atu sosa rihun 40, maibé osan la to’o entaun sosa de’it 20.800 hanesan ne’e”, Natalino informa.

Jornalista: Agapito dos Santos

Editór: Francisco Simões

 

HAKEREK NO HATÁN

Please enter your comment!
Please enter your name here