Foto/Google.

DILI, (TATOLI) – Diretór Jerál Ambiente Sekretáriu Estadu Ambiente (SEA), João Carlos Soares, husu ba komunidade atu labele soe lixu arbiru hodi proteje ambiente no tasi.

“Ita bele hatete afeta maka’as husi rai-leten tun bá tasi ne’e maka’as liu mak lixu”, dehan nia ba TATOLI iha Bebora, ohin.

Relasiona ho loron mundiál ba rai, nia haktuir peskiza lubuk ida maka iha katak globál nian lixu plástiku millaun lima naklekar iha mundu tomak, tama ona bá tasi iha millaun hitu resin, entaun tinan-tinan ida ne’e maka afeta.

“Lenuk dalaruma han plástiku, ikan han plástiku, ita lahatene materiál sira ne’e kímiku ne’ebé ikan ne’e han, ita lori fali mai hodi konsume (ikan) tanba ita rasik maka soe lixu sira ne’e”.

Tanba ne’e relasiona ba loron rai nian, diretór jerál ne’e husu konxiénsia ema nian importante liu atu tau lixu iha nia fatin mezmu lixu fatin seidauk barak, maibé ema iha hanoin atu tau fo’er iha nia fatin maka bele minimiza, maski la rezolve totál maibé iha asaun balu atu redús fo’er ne’e bá hotu tasi.

Diretór Jerál ne’e dehan sobre espésie ne’e barak loos, ba animál sira iha rai-maran, tasi-laran no mós kalohan, entaun saida maka presiza halo no liga ho mensajen Amu Papa Francisco nian iha nia livru ko’alia kona-ba casa comum, planeta ida ne’ebé maka agora daudaun hasoru ona ameasa lubuk ida liuliu alterasaun klimátika, degradasaun biodiversidade, solu, entaun saida maka presiza halo atu kombate ida ne’e.

Entaun, asaun ki’ik balu liuliu papél Sekretáriu Estadu Ambiente (SEA) liga ba estragu sira ne’e signifika husi atividade sira ne’ebé maka iha rai-leten hodi tun bá tasi-laran hodi estraga espésie sira iha tasi maka regula lisensa ambientál ne’ebé maka forte.

“Timór agora ba hela iha prosesu dezenvolvimentu, portu Tibar, depois kuaze ita-nia kosteira ne’e hetan ameasa ona tanba ita-nia restaurante ki’ikoan sira ne’ebé daudaun eziste ho komunidade nia atitude ne’ebé maka soe fo’er laiha fatin, entaun komesa halo ona presaun ba kosteira no mós iha tasi-laran”.

Tanba ne’e maka iha loron importante ida ne’e bolu atensaun ema hotu atubele selebra loron ne’e no tinan ne’e foku liu ba protesaun espésie, entaun ida ne’e pertinente loos ho polítika Governu nian maka fó interese ba jestaun kosteira no mariña, tanba área ne’e maka afeta maka’as husi atividade iha rai-leten hodi lori bá tasi.

Tanba ne’e maka SEA regula lisensa ambientál ne’e maka forte uitoan atu proponente ka sira husu lisensa atu halo atividade ne’e tenke fó atensaun ba ambiente ne’e maka’as, liuliu área ne’ebé sira konstrui ka dezenvolve labele fó impaktu ba ambiente.

“Haree estrada iha parte oeste nian, ita bele hatete sobu materiál barak ne’ebé maka halo presaun ba ahu-ruin depois portu Tibar mós foti sai Parapa lubuk ida ne’ebé halo protesaun ba tasi-ninin ho mós abitante sira iha tasi-ninin”, afirma.

Hatutan tan: “Maibé dezenvolvimentu hakarak ka lakohi tenke foti buat balu, maibé iha jestaun ne’ebé maka sira halo iha aprezentasaun planu jestaun ambientál, sira re koopera fatin ne’ebé sobu, inventa fali buat balu ne’ebé sira sobu ona para halo balansu iha konstrusaun ne’ebé sira iha”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here