Sekretáriu Estadu Juventude no Desportu (SEJD), Nélio Isaac Sarmento. Imajen/António Gonçalves

DILI, (TATOLI)-Komisaun Reguladora Arte Marsiál (KRAM) rekomenda ba Prezidente Repúblika ho governu, atu labele reativa arte marsiál tolu, kompostu husi Persaudaraan Setia Hati Terate (PSHT), Ikatan Keluarga Silat Putra Timor-Leste (IKS.PTL) Kera Sakti ho Kmanek Oan Raiklaran (KORK).

“Iha kontestu agora, laiha razaun atu reativa arte marsiál tolu,” hateten Sekretáriu Estadu Juventude no Desportu, Nélio Isaac Sarmento, ba jornalista sira iha Palásiu Prezidente Nicolau Lobato, Bairru Pité, Dili, Segunda (22/4/2019), hafoin akompaña ekipa KRAM hato’o relatóriu serbisu KRAM nian ba Prezidente Repúblika, Francisco Guterres Lú Olo.

KRAM mós rekomenda, tenke foti desizaun klaru no sansaun ne’ebé rigor ba entidade indivíduu ka koletivu iha instituisaun Estadu ne’ebé involve diretamente iha arte marsiál.

Nélio Isaac Sarmento hatutan, KRAM husu instituisaun kompetente, liuliu governu atu kontinua implementa lei nú.5/2017, katak bandu atividade arte marsiál tolu ne’e iha Timor.

“Atividade hosi arte marsiál tolu ne’ebé lei bandu hela, hamosu problema no hotu-hotu preokupa tantu Prezidente Repúblika rasik mós preokupa. Entaun, Komisaun Reguladora Arte Marsiál (KRAM) mai aprezenta kona-ba faktu sira ne’ebé KRAM iha no hato’o rekomendasaun ba órgaun kompetente, liuliu ba governu atu solusiona problema sira ne’e”, haktuir Nélio Isaac Sarmento.

Nélio Isaac lia tun dehan, Prezidente Repúblika preokupa ho buat lubuk ida, liuliu preokupa kona-ba lei katak iha lei, maibé implementasaun ladi’ak nafatin no ne’e akontese tanba problema saida. Tanba ne’e, Prezidente Repúblika fó ideia rua maka hanesan rezolve ho asuntu polítiku no ideia seluk maka rezolve ho lei.

“Ami sei aprezenta ba Konsellu Ministru atu haree kestaun ne’e, liuliu atu aplika lei ho rigór”, afirma  Nélio Isaac Sarmento.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here